കരുനാഗപ്പള്ളി: സമയോചിതമായ ഇടപെടലിലൂടെ നാടിനെ വന്‍ദുരന്തത്തില്‍ നിന്നു രക്ഷപ്പെടുത്തിയ യുവാവിന് അഭിനന്ദന പ്രവാഹം. കഴിഞ്ഞ ദിവസം എല്‍.പി.ജി. പാചക വാതക ഗ്യാസ് ടാങ്കറിന്റെ ടയറില്‍ തീ പിടിച്ചപ്പോഴാണ് കുലശേഖരപുരം കടത്തൂര്‍ കുരുമ്പോലില്‍ നിസാറിന്റെ സമയോചിത ഇടപെടലുണ്ടായത്. അല്‍പം വൈകിയിരുന്നെങ്കില്‍ തീ ആളിപ്പടര്‍ന്ന് വന്‍ദുരന്തം സംഭവിക്കുമായിരുന്നു.
ബുധനാഴ്ച പകല്‍ 11 ന് എറണാകുളത്ത് നിന്നും കല്ലമ്പലത്തിലേക്ക് പോവുകയായിരുന്ന ഐ.ഒ.സിയുടെ പാചക വാതക ടാങ്കറിന്റെ പിറക് വശത്തെ ടയര്‍ ജാമായി റോഡില്‍ കൂടി ഉരഞ്ഞാണ് തീപിടിത്തം ഉണ്ടായത്. ടാങ്കര്‍ ഡ്രൈവര്‍ ദേശീയപാത പുലിയന്‍കുളങ്ങരയ്ക്ക് സമീപം വാഹനം ഒതുക്കി നിര്‍ത്തി പകച്ച് നില്‍ക്കവേ സമീപത്ത് നില്‍ക്കുകയായിരുന്ന നിസാര്‍ ഫയര്‍ എസ്റ്റിങ്ങ് ഗ്വിഷര്‍ ഉപയോഗിച്ചും വെള്ളം പമ്പ് ചെയ്തും തീ അണക്കുകയായിരുന്നു. ഈ നിമിഷം ഹൈവേ പൊലിസും മറ്റുള്ളവരും ഭയന്ന് മാറി നില്‍ക്കുകയായിരുന്നു.
പതിമൂന്ന് പേര്‍ മരിക്കുകയും വന്‍നാശനഷ്ടമുണ്ടാവുകയും ചെയ്ത 2009 ലെ ടാങ്കര്‍ ദുരന്തം നടന്ന സ്ഥലത്ത് നിന്നും ഒരു കിലോമീറ്ററര്‍ ചുറ്റളവിലാണ് ഈ സംഭവവും നടക്കുന്നത്.
ഓച്ചിറയ്ക്കും പുത്തന്‍ തെരുവിനും ഇടയിലായി മൂന്ന് പാചകവാതക ടാങ്കര്‍ അപകടമാണ് നടന്നത്. അപകടത്തില്‍പ്പെട്ട മൂന്ന് ടാങ്കറും ഇന്ത്യന്‍ ഓയില്‍ കോര്‍പറേഷന്റെതായിരുന്നു.
അടിക്കടി ദേശീയപാതയില്‍ ടാങ്കര്‍ അപകടം ഉണ്ടാകുന്നതില്‍ വന്‍ പ്രതിഷേധമാണ് ഉയരുന്നത്. ഇത് സംബന്ധിച്ച് ഉന്നത അധികാരികള്‍ക്കും, കേന്ദ്ര സര്‍ക്കാറിനും പരാതി സമര്‍പ്പിക്കാനുള്ള തയ്യാറെടുപ്പിലാണ് മനുഷ്യാ അവകാശ സംഘടനയായ സി.സി.ആര്‍.പി.സി.