കൊച്ചി: മുഖ്യമന്ത്രിയെ കരിങ്കൊടി കാണിക്കാന്‍ ശ്രമിച്ച കെ.എസ്.യു പ്രവര്‍ത്തകര്‍  അറസ്റ്റില്‍. എറണാകുളത്ത് പൊതുപരിപാടിക്കെത്തിയ മുഖ്യമന്ത്രി ഗസ്റ്റ് ഹൗസില്‍ ഉണ്ടെന്ന വിവരം ലഭിച്ചതിനെ തുടര്‍ന്നെത്തിയ കെ.എസ്.യു പ്രവര്‍ത്തകരാണ് അറസ്റ്റിലായത്.
കെ.എസ്.യു സംസ്ഥാന ജനറല്‍ സെക്രട്ടറി എ.എ അജ്മല്‍, ജില്ല വൈസ്പ്രസിഡന്റ് ഭാഗ്യനാഥ്, ജില്ല സെക്രട്ടറി മുനീര്‍, ജില്ല കമ്മിറ്റി അംഗം ആല്‍ബിന്‍ അലക്‌സ്, ലോ അക്കാദമി യൂനിറ്റ് സെക്രട്ടറി സാംസണ്‍ എന്നിവരെയാണ് അറസ്റ്റ് ചെയ്ത് നീക്കിയത്. പ്രതിഷേധമുണ്ടാകാന്‍ സാധ്യതയുണ്ടെന്നറിഞ്ഞ് അസിസ്റ്റന്റ് കമ്മീഷണര്‍ കെ ലാല്‍ജിയുടെ നേതൃത്വത്തിലുള്ള പൊലിസ് സംഘം ഗസ്റ്റ് ഹൗസ്, മേനക, കോണ്‍വെന്റ് റോഡ് എന്നിവിടങ്ങളിലായി നിലയുറപ്പിച്ചിരുന്നു.
ബസില്‍ എത്തിയ പ്രവര്‍ത്തകര്‍ ഗസ്റ്റ് ഹൗസിന് മുന്നില്‍ ചാടിയിറങ്ങി കരിങ്കൊടിയുമായി മുന്നോട്ട് നീങ്ങാന്‍ ശ്രമിക്കുകയായിരുന്നു. ഇതോടെ പൊലിസ് കെ.എസ്.യു പ്രവര്‍ത്തകരെ അറസ്റ്റ് ചെയ്യുകയായിരുന്നു.