ആലുവ: എന്‍ജിനിയറിങ് ലക്ഷ്യമിട്ട് പ്ലസ് ടുവിനും എന്‍ട്രന്‍സിനും പഠനം നടത്തി ലക്ഷ്യത്തിലെത്തിയതിന്റെ ആഹ്ലാദത്തിലാണ് കെ.ഇ. എ .എം പ്രവേശന പരീക്ഷയില്‍ ഫാര്‍മസി വിഭാഗത്തില്‍ മൂന്നാം റാങ്ക് നേടിയ ആലുവ സ്വദേശി ഹില്‍മി പര്‍വീന്‍. ആശാന്‍ ലൈനിലെ ഗ്രീന്‍വ്യൂ ലൈനില്‍ തൈമയില്‍ നേവി ഉദ്യോഗസ്ഥനായ അമീറിന്റേയും മറിയം റഹമദിന്റേയും മകളാണ് ഹില്‍മി.
പ്ലസ് ടു വരെ കോട്ടയം മാന്നാനം കുര്യാക്കോസ് ഏലിയാസ് എച്ച്.എസ്.എസിലാണ് പഠിച്ചത്. പത്താം ക്ലാസുവരെ ആലുവ നിര്‍മ്മല എച്ച്.എസ്.എസിലും പഠിച്ചു. വനിത ഫിഡേ മാസ്റ്ററാണ്. 2013 ല്‍ ശ്രീലങ്കയില്‍ നടന്ന അന്താരാഷ്ട്ര ഏഷ്യന്‍ സ്‌കൂള്‍ ചെസ് മത്സരത്തിലും വിജയിയായി. പ്ലസ് ടുവിന് പഠിക്കുമ്പോള്‍ രണ്ട് വര്‍ഷം സംസ്ഥാന സ്‌കൂള്‍തല മത്സരത്തില്‍ സീനിയര്‍ വിഭാഗത്തില്‍ ചാമ്പ്യനായി പാഠ്യേതര വിഭാഗത്തിലും കഴിവു തെളിയിച്ചിട്ടുണ്ട് പര്‍വ്വീന്‍. കംപ്യൂട്ടര്‍ സയന്‍സില്‍ എന്‍ജിനീയറിങിന് പഠിക്കണമെന്നാണ് ഹില്‍മിയുടെ ആഗ്രഹം. മൂത്ത സഹോദരി തഹ്‌റീം ഫാത്തിമ ഹൈദരാബാദ് സെന്‍ട്രല്‍ യൂണിവേഴ്‌സിറ്റിയില്‍ എം.എസ്.സി വിദ്യാര്‍ത്ഥിയാണ്. ഇളയ സഹോദരി ഹനീന്‍ അമീര്‍ ആലുവ നിര്‍മ്മല എച്ച്.എസ്.എസിലെ പത്താം ക്ലാസ് വിദ്യാര്‍ഥിനിയാണ്.