തിരുനാവായ(മലപ്പുറം): സംസ്ഥാനത്ത് വൈദ്യുതി അപകടങ്ങളും ഇതുമൂലമുള്ള മരണങ്ങളും വർധിക്കുമ്പോഴും ആവശ്യത്തിന് ജീവനക്കാരില്ലാതെ നട്ടം തിരിയുകയാണ് കെ.എസ്.ഇ.ബി. പ്രധാനപ്പെട്ട  തീരുമാനങ്ങൾ കൈക്കൊള്ളേണ്ട തസ്തികകൾ പലതും ഒഴിഞ്ഞു കിടക്കുന്നതും വൈദ്യുതി ബോർഡിന്റെ പ്രവർത്തനം അവതാളത്തിലാക്കിയിരിക്കുകയാണ്. ജനങ്ങളെ നേരിട്ട് ബാധിക്കുന്ന വിഷയത്തിൽ അടിയന്തരമായി ഇടപെടുന്നതിന് മതിയായ ജീവനക്കാരെ നിയമിക്കാത്തത് സർക്കാരിൻ്റെ പിടിപ്പു കേടായാണ് വിലയിരുത്തുന്നത്.

 കെ.എസ്.ഇ.ബിയുടെ പ്രവർത്തനങ്ങൾ സുഗമമായി നടക്കണമെങ്കിൽ 36,524 ജീവനക്കാർ വേണമെന്നാണ് വിവരാവകാശ പ്രകാരമുള്ള കണക്ക്. 2024 ഡിസംബർ 14 വരെ ബോർഡിൽ 26,513 സ്‌ഥിരം ജീവനക്കാർ മാത്രമാണുള്ളത്. 10,011 പേരുടെ കുറവാണുള്ളത്. ഡിസംബറിനുശേഷം ഒഴിഞ്ഞുകിടക്കുന്ന തസ്‌തികകൾ കൂടി ചേർത്താൽ ഒഴിവുകളുടെ എണ്ണം ഇനിയും ഉയരും. ബോർഡിൻ്റെ പുനഃസംഘടനയ്ക്കായി തയാറാക്കിയ സ്പെഷൽ റൂളിൽ വർഷങ്ങൾ കഴിഞ്ഞിട്ടും  അന്തിമ തീരുമാനം എടുക്കാതെ  നിയമന തടസമെന്ന സാങ്കേതികത്വത്തിൽ പിടിച്ച് ഒഴിഞ്ഞുമാറുകയാണ് സർക്കാർ എന്നാണ് ആരോപണം.

 12 വർഷമായി കെ.എസ്.ഇ.ബിയിൽ ഫീൽഡ് ജീവനക്കാരുടെ സ്ഥിരനിയമനം നടക്കുന്നില്ല. കഴിഞ്ഞ മൂന്ന് വർഷത്തിനിടെ 4,500ലധികം ജീവനക്കാരാണ് വിരമിച്ചത്. നാലായിരത്തിലധികം വർക്മെൻ തസ്തിക ഒഴിഞ്ഞു കിടക്കുന്നതോടൊപ്പം 45 എക്സിക്യൂട്ടീവ് എൻജിനീയർ, 60 അസിസ്‌റ്റൻ്റ് എക്‌സിക്യൂട്ടീവ് എൻജിനീയർ, നൂറിലധികം അസിസ്‌റ്റൻ്റ് എൻജിനീയർ തസ്‌തികകളും ഒഴിഞ്ഞുകിടക്കുമ്പോണ്  പകരം നിയമനത്തിന് നടപടിയെടുക്കാതെ നീട്ടിക്കൊണ്ടു പോകുന്നത്.

മസ്ദൂർ, വർക്കർ അടക്കമുള്ള തസ്തികകളിൽ ഒഴിവു റിപ്പോർട്ട് ചെയ്യുന്നത് കെ.എസ്.ഇ.ബി നിർത്തിവച്ചിരിക്കുകയാണ്. നിയമനം നടക്കുന്ന മറ്റു തസ്തികകളിലാകട്ടെ ഒഴിവുകൾ റിപ്പോർട്ട് ചെയ്യുന്നത് വളരെ കുറവുമാണ്.