ഛത്തീസ്ഗഡ്: ഛത്തീസ്ഗണ്ഡിൽ മലയാളി കന്യാസ്ത്രീകൾ അറസ്റ്റിലായ സംഭവത്തിൽ നിയമസഹായത്തിനായി കേരളത്തിൽ നിന്നുള്ള ബിജെപി പ്രതിനിധി അനൂപ് ആന്റണി ഇന്ന് റായ്പൂരിൽ എത്തും. ഛത്തീസ്ഗഡ് ഉപമുഖ്യമന്ത്രിയെ അടക്കം കണ്ട് കേസുമായി ബന്ധപ്പെട്ട വിവരങ്ങൾ അനൂപ് ആന്റണി ഇന്ന് ചർച്ച ചെയ്യും. ഇതിനിടെ പ്രതിപക്ഷ എംപിമാരുടെ സംഘവും ഛത്തീസ്ഗണ്ടിലേക്ക് പുറപ്പെട്ടിട്ടുണ്ട്. എൻ കെ പ്രേമചന്ദ്രൻ, ഫ്രാൻസിസ് ജോർജ്, ബെന്നിബഹ്നാൻ തുടങ്ങിയവരാണ് ഛത്തീസ്ഗഡിൽ എത്തുക. 

അതേസമയം ബിജെപി പ്രതിനിധിയുടെ വരവുമായി ബന്ധപ്പെട്ട് നിഷ്പക്ഷമായ അന്വേഷണം വേണമെന്നാണ് ഛത്തീസ്ഗഡിലെ വൈദികർ ആവശ്യപ്പെടുന്നത്.  കേരളത്തിലെ ബിജെപി പ്രതിനിധി ഇവിടെയുള്ളവരുടെ തെറ്റിദ്ധാരണ നീക്കാൻ ഇടപെടണമെന്ന് ഛത്തീസ്ഗണ്ടിലെ കന്യാസ്ത്രീകളുടെ മോചനത്തിനായി പ്രവർത്തിക്കുന്ന റായ്പൂർ അതിരൂപത വൈദികനായ സാബു ജോസഫ് പറഞ്ഞു.  കന്യാസ്ത്രീയുടെ സേവന പ്രവർത്തനങ്ങൾ എന്തൊക്കെയാണെന്ന് ഇവിടെയുള്ളവരെ ബോധ്യപ്പെടുത്താനാണ് ഇത്തരത്തിൽ ഇടപെടേണ്ടത് വരുന്ന ആൾക്ക് കന്യാസ്ത്രീയെ കുറിച്ച് ബോധം ഉണ്ടെന്നാണ് പ്രതീക്ഷയെന്നും സാബു ജോസഫ് പറഞ്ഞു. 

ALSO READ: ന്യൂയോർക്കിൽ വെടിവെപ്പ്, രണ്ട് പേർക്ക് വെടിയേറ്റു; അക്രമി സ്വയം വെടിവെച്ച് ജീവനൊടുക്കി

ഛത്തീസ്ഗഡ് മുഖ്യമന്ത്രി വിഷ്ണു ദേവ് സായിയുടെ മനുഷ്യക്കടത്ത് നടന്നു  എന്ന പ്രതികരണം വളരെ നേരത്തെ ആയിപ്പോയെന്നും സംഭവത്തിൽ സ്വതന്ത്രമായ അന്വേഷണം ആണ് നടക്കേണ്ടതെന്നും കൃത്യമായ അന്വേഷണം നടന്നാൽ മാത്രമേ സത്യം പുറത്തു വരുകയുള്ളൂ എന്നും സാബു ജോസഫ് വ്യക്തമാക്കി. തെറ്റിദ്ധാരണകൾ മാറ്റാനായി മലയാളി കേന്ദ്രമന്ത്രിമാർ ഇടപെടണമെന്നും ഇടപെടേണ്ടത് അവരുടെ ഉത്തരവാദിത്തമാണെന്നും സാബു ജോസഫ് ചൂണ്ടിക്കാട്ടി.

നിലവിൽ ഛത്തീസ്ഗഢിലെ ദുർഗ് ജില്ലാ ജയിലിൽ കന്യാസ്ത്രീകൾ നിലവിൽ റിമാൻഡിൽ കഴിയുകയാണ്. സിസ്റ്റർ പ്രീതിയെ ഒന്നാം പ്രതിയും സിസ്റ്റർ വന്ദനയെ രണ്ടാം പ്രതിയുമാക്കിയാണ് കേസ്. മനുഷ്യക്കടത്തും നിർബന്ധിത മതപരിവർത്തനവും ആരോപിച്ചാണ് കേസ്. ഈ വകുപ്പുകൾ ഛത്തീസ്ഗഢിൽ ജാമ്യം ലഭിക്കാത്ത കുറ്റങ്ങളാണ്. 10 വർഷം വരെ തടവ് ലഭിക്കാവുന്ന ഗുരുതര കുറ്റങ്ങളാണ് ഇവ. കോടതിയുടെ തുടർനടപടികൾ കന്യാസ്ത്രീകളുടെ കാര്യത്തിൽ നിർണായകമാകും.