ന്യൂഡല്‍ഹി: ചീഫ് ജസ്റ്റിസിനെതിരെ വാര്‍ത്താസമ്മേളനം വിളിച്ച് ആരോപണമുന്നയിച്ച ജസ്റ്റിസ് ചെലമേശ്വര്‍ നാളെ വിരമിക്കുന്നു. അതേസമയം, മലയാളിയായ കെ.എം ജോസഫിന്റെ നിയമന കാര്യത്തില്‍ ഇതുവരെയും തീരുമാനമായില്ല. കൊളീജിയം കെ.എം ജോസഫിനെ നിര്‍ദേശിച്ചെങ്കിലും കേന്ദ്ര സര്‍ക്കാര്‍ തള്ളിയതോടെയാണ് അനിശ്ചിതത്വത്തിലായത്.

എന്നാല്‍ ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ ചെലമേശ്വര്‍, രന്‍ജന്‍ ഗൊഗോയ്, എം.ബി ലോകുര്‍, കുര്യന്‍ ജോസഫ് എന്നിവര്‍ അടങ്ങുന്ന കൊളിജീയം ജോസഫിന്റെ പേര് വീണ്ടും ശുപാര്‍ശ ചെയ്തിരുന്നു.

ചെലമേശ്വര്‍ വിരമിക്കുന്നതോടെ, സീനിയോറിറ്റിയില്‍ ആറാമതുള്ള ജസ്റ്റിസ് എ.കെ സിക്രി കൊളീജിയത്തില്‍ ഇടംപിടിക്കും. ഇതോടെ ജോസഫിനെ ജഡ്ജിയാക്കണമെന്ന് വീണ്ടും ശുപാര്‍ശ വന്നേക്കും.