മനാമ: കൊറോണ വൈറസും വിദ്വേഷ വൈറസും മഹാമാരിയായ ഈ നോമ്പുകാലത്തും നോമ്പനുഷ്ഠിക്കുന്നവന്റെ ദാഹമകറ്റാന്‍ ഹരിദാസുണ്ട്. ബഹ്‌റൈനിലെ ഒരു കേരളക്കാരന്‍. കൊവിഡിനെ മതവിരോധത്തിനും വര്‍ഗീയതക്കുമായി ഉപയോഗപ്പെടുത്തുന്നവര്‍ക്ക് മാനവ സൗഹാര്‍ദ്ദവും കാരുണ്യവും പ്രവര്‍ത്തിയിലൂടെ പഠിപ്പിക്കുകയാണ് ഹരിദാസ് എന്ന ഈ ബഹ്‌റൈന്‍ പ്രവാസി.

വിശുദ്ധ റമദാനില്‍ വ്രതമെടുക്കുന്ന വിശ്വാസികള്‍ക്കായി ഇഫ്താര്‍ സമയം ജ്യൂസ് ഉള്‍പ്പെടെയുള്ളവ എത്തിക്കുന്ന പതിവ് ഹരിദാസ് എന്ന ഈ തൃശൂര്‍ സ്വദേശിക്ക് നേരത്തെയുണ്ട്. ബഹ്‌റൈനിലെ മസ്ജിദുകള്‍ കേന്ദ്രീകരിച്ചായിരുന്നു വര്‍ഷം തോറും ഇത് ചെയ്തു വന്നിരുന്നത്. എന്നാല്‍ ഇത്തവണത്തെ റമദാന്‍ കൊവിഡ് പശ്ചാതലത്തിലായതിനാല്‍ രാജ്യത്തെ പള്ളികളെല്ലാം അടഞ്ഞു കിടക്കുകയാണ്.

എന്നാല്‍ ഹരിദാസ് തന്റെ പുണ്യ പ്രവര്‍ത്തി മുടക്കാന്‍ തയ്യാറായില്ല. തന്റെ സ്‌നേഹസമ്മാനവുമായി ബഹ്‌റൈന്‍ കെ.എം.സി.സിയെ സമീപിച്ചു അദ്ദേഹം. ബഹ്‌റൈനിലുടനീളം വിവിധ കേന്ദ്രങ്ങളിലായി കെ.എം.സി.സിയുടെ നേതൃത്വത്തില്‍ ഇഫ്താര്‍ കിറ്റ് വിതരണം നടക്കുന്ന വിവരം ഇതിനകം അദ്ദേഹം അറിഞ്ഞിരുന്നു. ഈ ഇഫ്താര്‍ വിഭവം അര്‍ഹരായ വിശ്വാസികളിലേക്കെത്തിക്കണമെന്ന അഭ്യര്‍ത്ഥന മാത്രമാണ് ഹരിദാസിനുണ്ടായിരുന്നത്.കെ.എം.സി.സി ഭാരവാഹികള്‍ അവ സന്തോഷത്തോടെ സ്വീകരിക്കുകയും ചെയ്തു.

അടുത്ത ദിവസം മുതല്‍ കെ.എം.സി.സിയുടെ ഇഫ്താര്‍ കിറ്റുകളോടൊപ്പം മതസൗഹാര്‍ദ രുചിയുള്ള ഹരിദാസിന്റെ പാനീയങ്ങളും വിതരണം ചെയ്യുമെന്ന് ബഹ്റൈന്‍ കെ.എം.സി.സി ഭാരവാഹികള്‍ അറിയിച്ചു.
ഈ പ്രവാസിയുടെ പുണ്യപ്രവൃത്തി മതസൗഹാര്‍ദത്തിന് കരുത്ത് പകരുന്നതാണെന്നും അദ്ദേഹത്തിന്റെ ഉദ്ദേശലക്ഷ്യംപോലെ ഇവ അര്‍ഹരിലേക്കെത്തിക്കുമെന്നും ഭാരവാഹികള്‍ കൂട്ടിച്ചേര്‍ത്തു.

ഏതായാലും ഈ കൊവിഡ് കാലത്തും ജാതിയും മതവും കലര്‍ത്തി വിഭാഗീയത സൃഷ്ടിക്കുന്നവര്‍ക്ക്, നല്ല മാതൃകയും പാഠവുമാകുകയാണ് തൃശൂര്‍ സ്വദേശിയായ ഹരിദാസ് എന്ന ബഹ്‌റൈന്‍ പ്രവാസി. വിശദവിവരങ്ങള്‍ക്ക് - +973 3551 7498.--
.
.