കുറച്ചുകാലമായി ഭരണപക്ഷത്തിനു മൂന്നാറെന്നു കേള്‍ക്കുന്നത് ഒട്ടും ഇഷ്ടമല്ല. അതിന്റെ കൂടെ മുഖ്യമന്ത്രി പിണറായി വിജയന്റെ പേരു കൂടി ആരെങ്കിലും ചേര്‍ത്തു പറഞ്ഞാല്‍ അവരതു സഹിക്കില്ല. ഭൂമി കൈയേറ്റമെന്നു പറയുന്നവരെയാകട്ടെ വെറുതെ വിടുകയുമില്ല. ഇന്നലെ സഭയില്‍ മൂന്നാറിലെ ഭൂമി കൈയേറ്റത്തെക്കുറിച്ച് സംസാരിക്കാന്‍ ശ്രമിച്ച പി.ടി തോമസ് അതു ശരിക്കും അനുഭവിച്ചു. മൂര്‍ച്ചയേറിയ വാക്കുകളിലൂടെ പ്രതിപക്ഷത്തെ നന്നായി പ്രകോപിപ്പിച്ച് അവരുടെ രോഷം പരമാവധി പുറത്തെടുപ്പിച്ച് അദ്ദേഹമതു നന്നായി ആസ്വദിക്കുകയും ചെയ്തു.
കോടതികളെ വരുതിയിലാക്കുന്ന കേന്ദ്ര സര്‍ക്കാരിനെയും പ്രധാനമന്ത്രി നരേന്ദ്രമോദിയെയും കുറ്റം പറഞ്ഞു തുടങ്ങിയ തോമസിന്റെ വാക്കുകളെ തുടക്കത്തില്‍ ഭരണപക്ഷം അനുഭാവത്തോടെയാണ് കേട്ടിരുന്നത്. എന്നാല്‍, വൈകാതെ തോമസ് ബില്‍ വിഷയത്തെ വ്യത്യസ്തമായ മറ്റൊരു വിഷയവുമായി ബന്ധിപ്പിച്ചതോടെയാണ് ഊഷ്മളമായ ഈ പ്രതിപക്ഷ- ഭരണപക്ഷ ബന്ധം തകിടംമറിഞ്ഞത്. കോടതികളില്‍ നിന്നു മാത്രമല്ല മുഖ്യമന്ത്രിയുടെ ഓഫിസില്‍ നിന്നു പോലും സുപ്രധാന ഫയലുകള്‍ കാണാതാകുന്നു.

മൂന്നാറിലെ ഭൂമി കൈയേറ്റത്തെക്കുറിച്ച് ജോയ്‌സ് ജോര്‍ജ് എം.പിക്കെതിരായ കണ്ടെത്തലുകളടക്കമുള്ള ശ്രീരാം വെങ്കിട്ടരാമന്റെ റിപ്പോര്‍ട്ട് 2017 മെയ് ഏഴിനു മുഖ്യമന്ത്രിയുടെ ഓഫിസിനു കൈമാറിയതാണ്.അതിനെക്കുറിച്ച് ഇപ്പോള്‍ ഒരു വിവരവുമില്ല. വിവരാവകാശപ്രകാരം ചോദിച്ചിട്ടും ഫയല്‍ എവിടെയെന്ന വിവരം ലഭിക്കുന്നില്ലെന്നും വിവരാവകാശ രേഖ ഉയര്‍ത്തിക്കാട്ടി തോമസ്.
ഫയല്‍ പിണറായി വിജയന്‍ മുക്കിയെന്നു പറഞ്ഞുകൊണ്ട് തോമസ് കുറച്ചുകൂടി എണ്ണ ഒഴിച്ചുകൊടുത്തതോടെ ഭരണപക്ഷ രോഷം ആളിക്കത്തി. മുഖ്യമന്ത്രിയെക്കുറിച്ചു പറഞ്ഞതും മൂന്നാറിലെ കൈയേറ്റം എന്ന പ്രയോഗവുമൊന്നും രേഖകളിലുണ്ടാകരുതെന്ന് എസ്. രാജേന്ദ്രന്‍. മുഖ്യമന്ത്രി ഫയല്‍ മുക്കിയെന്നത് അപകീര്‍ത്തികരമാണെന്ന് ടി.വി രാജേഷ്. പിണറായി വിജയനെന്നത് സഭയില്‍ പറയാനാവാത്ത വിധം മോശപ്പെട്ട വാക്കാണോ എന്നും പിണറായിയെക്കുറിച്ചു മിണ്ടരുതെന്നു പറഞ്ഞ് പേടിപ്പിക്കുകയാണോ എന്നും പിണറായിക്കെന്താ കൊമ്പുണ്ടോ എന്നുമൊക്കെ തോമസ് ചോദിച്ചപ്പോള്‍ സി.പി.എം അംഗങ്ങളില്‍ ചിലര്‍ ബഹളം വച്ച് എഴുന്നേറ്റു മുന്നോട്ടു നീങ്ങി. ഇതോടെ പ്രതിപക്ഷാംഗങ്ങളും എഴുന്നേറ്റതോടെ സഭ കുറച്ചു സമയം ബഹളത്തില്‍ മുങ്ങി.

ഇതിനിടയില്‍ മുഖ്യമന്ത്രി ഫയലില്‍ അടയിരിക്കുന്നത് പ്രസവിക്കാനാണോ എന്ന് തോമസ് ചോദിച്ചതിനെതിരേ ക്രമപ്രശ്‌നവുമായി ഇ.എസ് ബിജിമോള്‍ എത്തി. ഇതു സഭയില്‍ നടത്താന്‍ പറ്റാത്ത വാക്കുകളാണെന്നും ഇങ്ങനെ പറഞ്ഞുതുടങ്ങിയാല്‍ ഒരുപാട് അടയിരുന്നു പ്രസവം നടക്കുമെന്നും ബിജിമോള്‍. ദയവായി സഭയില്‍ പ്രസവിക്കരുതെന്ന് തോമസ് പറഞ്ഞപ്പോള്‍ വീണ്ടും ഭരണപക്ഷത്ത് ബഹളമുയര്‍ന്നു.