പേരാമ്പ്ര: മകളുടെ വിവാഹ ദിനത്തില്‍ അഞ്ചു നിര്‍ധന യുവതികള്‍ക്ക് മംഗല്യ സൗഭാഗ്യം നല്‍കി കക്കാട് കരിമ്പില്‍ പൊയില്‍ അസീസ്.
വിവാഹ സ്വപ്നങ്ങള്‍ക്കു മീതെ ജീവതിതത്തിലെ സാമ്പത്തിക പ്രതിസന്ധി കരിനിഴല്‍ വീഴ്ത്തിയ യുവതികള്‍ക്കായി അസീസ് സഹായ ഹസ്തം നീട്ടിയപ്പോള്‍ ഒരു നാടാകെ വിവാഹ പന്തലില്‍ ഒഴുകിയെത്തി. അസീസിന്റെ മകള്‍ ഹസ്‌നയും എടവരാട് നെല്ലിക്കുന്നത്ത് അമ്മതിന്റെ മകന്‍ നിഷാദും തമ്മിലുള്ള നിക്കാഹ് വേദിയാണ് വയനാട് മുട്ടില്‍ യതീംഖാനയിലെ അന്തേവാസികളായ അഞ്ചു പെണ്‍കുട്ടികള്‍ക്ക് പുതു ജീവിതത്തിലേക്ക് വഴി തുറന്നത്. ഓരോ വധുവിനും ആറു പവന്‍ സ്വര്‍ണ്ണാഭരണം വീതവും വധൂ വരന്മാര്‍ക്ക് വിവാഹ വസ്ത്രങ്ങളും നല്‍കി. ജീവകാരുണ്യ രംഗത്ത് നിറസാനിധ്യമായ അസീസ് സ്വന്തം വീട്ടിലൊരുക്കിയ സ്‌നേഹ വിരുന്നില്‍ 6000ത്തില്‍ അധികം ആളുകള്‍ പങ്കെടുത്തു. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നികാഹിന് കാര്‍മികത്വം വഹിച്ചു.
സമസ്ത ജില്ലാ സെക്രട്ടറി പി.എം കോയ മുസ്‌ലിയാര്‍, ജബലുന്നൂര്‍ കോളജ് മേധാവി റഫീഖ് സകരിയ്യ ഫൈസി, മുബഷിര്‍ യമാനി, ഡോ. അബ്ദുല്‍ ലത്വീഫ് നദ്‌വി , സി.പി.എ അസീസ്, എസ്.പി കുഞ്ഞമ്മദ്, കെ.പി യൂസുഫ്, കെ.പി റസാഖ്, മമ്മൂട്ടി ഹാജി അണിയാരത്ത് തുടങ്ങിയവര്‍ സംബന്ധിച്ചു.