നെടുങ്കണ്ടം: കല്ലാറില്‍ പുതുതായി പാലം നിര്‍മിച്ചപ്പോള്‍ സമീപവാസികളുടെ കെട്ടിടങ്ങള്‍ സംരക്ഷിക്കാന്‍ കൃത്രിമം കാട്ടിയതായി ആക്ഷേപം. ഇതേ തുടര്‍ന്ന് നാട്ടുകാര്‍ ഇന്നലെ പ്രതിഷേധവുമായി രംഗത്തെത്തി.
ചേമ്പളത്തേക്കു തിരിയുന്ന ജങ്ഷനിലെ കടകള്‍ക്കുവേണ്ടിയാണ് പാലത്തിന്റെ അവസാനഭാഗത്ത് വീതി കുറച്ചത്. ഇവിടെ പാലത്തിന്റെ വീതിയും കഴിഞ്ഞുവേണം ഓട നിര്‍മിക്കാന്‍. എന്നാല്‍ കെട്ടിട ഉടമകളെ സഹായിക്കാന്‍ ഈ ഭാഗത്ത് പാലത്തിന്റെ ഉള്ളിലേക്കു കയറ്റി റോഡില്‍ നിന്ന് ഓട നിര്‍മിക്കുകയാണുണ്ടായത്. ഇതോടെ ചേമ്പളത്തുനിന്ന് വരുന്ന റോഡിന്റെ വീതി കുറഞ്ഞു. നെടുങ്കണ്ടത്തു നിന്ന് എത്തുന്ന ഭാഗത്തും നിയമാനുസരണം ഓട നിര്‍മിച്ചാല്‍ പലരുടെയും ഭൂമി നഷ്ടമാവും.
 ഇതും ഒഴിവാക്കാനാണ് നിര്‍മാണത്തില്‍ ബന്ധപ്പെട്ട അധികൃതര്‍ കൃത്രിമം കാട്ടിയത്. പാലത്തിന്റെ വീതിക്ക് അനുസരിച്ച് ഇരുഭാഗത്തും റോഡിനു വീതി കുറയാന്‍ ഇതു കാരണമാവും. അതോടൊപ്പം ഇരുഭാഗത്തു നിന്നു ഒലിച്ചുവരുന്ന വെള്ളം കൃത്യമായി ഒലിച്ചുപോവാതെ വെള്ളക്കെട്ടിനും കാരണമാവും.
അഴിമതിഅവസാനിപ്പിക്കണമെന്നും കൃത്യമായ അളവില്‍ റോഡിനു വീതിയെടുത്ത് വശങ്ങളില്‍ ഓടനിര്‍മിക്കണമെന്നും ആവശ്യപ്പെട്ടാണ് നാട്ടുകാര്‍ രംഗത്തുവന്നത്. പ്രതിഷേധം ശക്തമായതോടെ അധികൃതര്‍ എത്തി നാട്ടുകാരുമായി ചര്‍ച്ച നടത്തി. പ്രശ്‌നത്തിന് അടിയന്തര പരിഹാരം കണ്ടില്ലെങ്കില്‍ പ്രക്ഷോഭപരിപാടികളുമായി രംഗത്തുവരാനാണു നാട്ടുകാരുടെ തീരുമാനം.