മഞ്ചേരി: രാത്രിമുതല്‍ പുലരുവോളം ഉറക്കമൊഴിച്ച് വാഹനം ഓടിക്കുന്ന ഡ്രൈവര്‍മാരെയും യാത്രക്കാരെയും ബോധവല്‍ക്കരിക്കാന്‍ പൊലിസ് നടത്തിയ വേറിട്ട പ്രവര്‍ത്തനം ശ്രദ്ധേയമായി. വഴിമധ്യേ ഡ്രൈവര്‍മാര്‍ക്ക് ചൂടുള്ള ചായ നല്‍കിയാണ് മഞ്ചേരി എ.എസ്.ഐ അബ്ദുല്‍ ഹക്കീമിന്റെ നേതൃത്വത്തിലുള്ള പൊലിസ് സംഘം ഇന്നലെ നൂറുകണക്കിനു ഡ്രൈവര്‍മാര്‍ക്ക് സുരക്ഷിത യാത്ര എന്ന വിഷയത്തിലൂന്നി ബോധവല്‍ക്കരണം നല്‍കിയത്.
മഞ്ചേരിയിലെ പ്രധാന കേന്ദ്രങ്ങളായ കച്ചേരിപ്പടി ബൈപ്പാസ് ജങ്ഷന്‍, തുറക്കല്‍ ബൈപ്പാസ് ജങ്ഷന്‍, ആനക്കയം, നെല്ലിപറമ്പ് എന്നിവിടങ്ങളിലാണ് രാത്രി 12മുതല്‍ പുലര്‍ച്ചെ നാലുവരെയായി ബോധവല്‍ക്കരണം നടത്തിയത്. അര്‍ധ രാത്രിയില്‍ വാഹനത്തിനു പൊലിസ് കൈകാണിക്കുന്നത് കണ്ട് ഡ്രൈവര്‍മാര്‍ ആദ്യമൊന്ന് അമ്പരന്നെങ്കിലും വാഹനം നിര്‍ത്തിയതോടെ പൊലിസ് വാഹനത്തില്‍ നിന്നും ചായ എടുക്കുന്നത് കണ്ട ഡ്രൈവര്‍മാര്‍ക്കു ആശ്വാസമായി. തുടര്‍ന്ന് അമിത വേഗത നിയന്ത്രിക്കേണ്ടതിന്റെയും സീറ്റ് ബെല്‍റ്റ് ധരിച്ചു യാത്ര തുടരേണ്ടതിന്റെയും പ്രാധാന്യം പറഞ്ഞു ബോധവാന്‍മാരാക്കിയ ശേഷമാണ് ഓരോ വാഹനവും പൊലിസ് കടത്തിവിട്ടത്.