നെടുമ്പാശേരി: ലോക്ഡൗണിനെ തുടര്‍ന്ന് വിദേശത്തു കുടുങ്ങിയ മലയാളികളില്‍ സിംഗപ്പൂരില്‍നിന്നും ദമാമില്‍നിന്നുമുള്ള 305 പേര്‍ നെടുമ്പാശേരിയിലെത്തി. ദമാമില്‍നിന്നും ആറു കൈക്കുഞ്ഞുങ്ങള്‍ അടക്കം 174 പേരും സിംഗപ്പൂരില്‍നിന്നു 131 പേരുമാണ് എത്തിയത്. ദമാമില്‍നിന്നുള്ള ഐ എക്‌സ് 1924 നമ്പര്‍ എയര്‍ ഇന്ത്യ എക്‌സ്പ്രസ് വിമാനം ഇന്നലെ രാത്രി 8.12 നാണ് നെടുമ്പാശേരിയിലെത്തിയത്. ഈ വിമാനത്തില്‍ ഏറ്റവും കൂടുതല്‍ പേര്‍ കൊല്ലം ജില്ലയില്‍ നിന്നുള്ളവരായിരുന്നു. 38 പേരാണ് കൊല്ലം ജില്ലയില്‍നിന്നു വിമാനത്തില്‍ ഉണ്ടായിരുന്നത്. ഒരു തമിഴ്‌നാട് സ്വദേശിയും ഉണ്ടായിരുന്നു. സിംഗപ്പൂരില്‍നിന്നുള്ള ഐ എക്‌സ് 485 നമ്പര്‍ എയര്‍ ഇന്ത്യ എക്‌സ്പ്രസ് വിമാനം രാത്രി 10.50 നാണ് നെടുമ്പാശേരിയിലെത്തിയത്. ബംഗളുരു വഴി എത്തിയ വിമാനത്തില്‍ 131 മലയാളികളാണ് ഉണ്ടായിരുന്നത്.

 സിംഗപ്പൂരില്‍നിന്നും വിമാനത്തില്‍ കയറിയ 180 പേരില്‍ 49 പേര്‍ ബംഗളുരുവില്‍ ഇറങ്ങി.