കണ്ണൂര്‍: പ്രവാസികളുമായുള്ള ആദ്യ വിമാനം കണ്ണൂരിലെത്തി. ഇന്നലെ രാത്രി 7.24നാണ് ദുബൈയില്‍ നിന്നുള്ള 182 യാത്രക്കാരുമായി എയര്‍ഇന്ത്യാ എക്‌സ്പ്രസ് വിമാനം കണ്ണൂര്‍ അന്താരാഷ്ട്രാ വിമാനത്താവളത്തിലിറങ്ങിയത്. 

കണ്ണൂരിലേക്കുള്ള യാത്രക്കാരില്‍ 162 പേര്‍ മുതിര്‍ന്നവരും 15 കുട്ടികളും അഞ്ചു നവജാത ശിശുക്കളുമാണ്. കൊവിഡ് വ്യാപന ഭീതിയുടെ പശ്ചാത്തലത്തില്‍ എത്തുന്നവരെ സ്വീകരിക്കുന്നതിനും പരിശോധിക്കുന്നതിനും ക്വാറന്റൈനിലേക്ക് അയക്കുന്നതിനുമായി വിപുലമായ സംവിധാനം വിമാനത്താവളത്തില്‍ ഒരുക്കിയിരുന്നു. 

കണ്ണൂര്‍ ജില്ലയില്‍ നിന്നുള്ള 109 പേരും കാസര്‍കോട് നിന്നുള്ള 47 പേരും വിമാനത്തില്‍ ഉള്‍പ്പെടും. മറ്റു ജില്ലകളില്‍ നിന്നുള്ളവര്‍: കോഴിക്കോട് 12, മലപ്പുറം 07, മാഹി 03, വയനാട് 01, തൃശൂര്‍ 01. 

ഗര്‍ഭിണികളും കുട്ടികളും ഒഴികെയുള്ള ഓരോ ജില്ലക്കാരെയും അതാത് ജില്ലകളിലെ ക്വാറന്റൈന്‍ കേന്ദ്രങ്ങളിലേക്കു മാറ്റി.