വാഷിങ്ടണ്‍: റഷ്യയില്‍ കൊവിഡ് ബാധിതരുടെ എണ്ണം കുതിച്ചുകയറുന്നു. ദിവസേന പതിനായിരത്തിലേറെ പേര്‍ക്കാണ് കൊവിഡ് സ്ഥിരീകരിക്കുന്നത്. രാജ്യത്ത് കൊവിഡ് സ്ഥിരീകരിച്ചവരുടെ എണ്ണം 2.32 ലക്ഷമായി ഉയര്‍ന്നു. കഴിഞ്ഞയാഴ്ചവരെ ഇവിടെ രോഗം സ്ഥിരീകരിച്ചവരുടെ എണ്ണം ഒരു ലക്ഷത്തില്‍ താഴെയായിരുന്നു. ദിവസങ്ങള്‍ക്കുള്ളിലാണ് വന്‍ വര്‍ധനവുണ്ടായിരിക്കുന്നത്. ഇന്നലെവരെ റഷ്യയില്‍ കൊവിഡ് ബാധിച്ച് മരിച്ചവരുടെ എണ്ണം 2,116 ആണ്. ഇന്നലെ 107 പേര്‍ മരിച്ചിട്ടുണ്ട്. അതേസമയം, ലോകത്ത് കൂടുതല്‍ കൊവിഡ് മരണങ്ങള്‍, രോഗം എന്നിവ സ്ഥിരീകരിച്ചിരിക്കുന്നത് അമേരിക്കയില്‍തന്നെയാണ്.

ലോകത്താകെ കൊവിഡ് ബാധിച്ച് മരിച്ചവരുടെ എണ്ണം 2,87,615 ആയി ഉയര്‍ന്നു. 42.73 ലക്ഷം പേര്‍ക്കാണ് രോഗം സ്ഥിരീകരിച്ചിരിക്കുന്നത്. 15.36 ലക്ഷം പേര്‍ രോഗവിമുക്തരായിട്ടുണ്ട്. ലോകാരോഗ്യ സംഘടന നല്‍കുന്ന ഔദ്യോഗിക കണക്കുപ്രകാരം 2,81,736 പേരാണ് കൊവിഡ് ബാധിച്ച് മരിച്ചിരിക്കുന്നത്. 40,58,252 പേര്‍ക്കു രോഗം സ്ഥിരീകരിച്ചതായും ഔദ്യോഗിക കണക്ക് വ്യക്തമാക്കുന്നു.

അതേസമയം, അമേരിക്കയില്‍ കൊവിഡ് ബാധിച്ചുള്ള മരണസംഖ്യ 81,795 ആയി ഉയര്‍ന്നു. 13.86 ലക്ഷം പേര്‍ക്കാണ് ഇവിടെ രോഗം സ്ഥിരീകരിച്ചിരിക്കുന്നത്. രോഗം സ്ഥിരീകരിച്ചവരുടെ എണ്ണത്തില്‍ സ്‌പെയിനാണ് രണ്ടാം സ്ഥാനത്ത്. 

ഇവിടെ 2.68 ലക്ഷം പേര്‍ക്കു രോഗം സ്ഥിരീകരിച്ചപ്പോള്‍ നിലവില്‍ മൂന്നാം സ്ഥാനത്ത് റഷ്യയാണ്. ബ്രിട്ടന്‍ (2.23 ലക്ഷം), ഇറ്റലി (2.2 ലക്ഷം) എന്നിവിടങ്ങളിലും രോഗബാധിതരുടെ എണ്ണം രണ്ടു ലക്ഷം പിന്നിട്ടിട്ടുണ്ട്. 

ഫ്രാന്‍സ്, ജര്‍മനി, ബ്രസീല്‍ എന്നിവിടങ്ങളില്‍ രോഗികളുടെ എണ്ണം ഒന്നര ലക്ഷം പിന്നിട്ടപ്പോള്‍ തുര്‍ക്കിയിലും ഇറാനിലും ഒരു ലക്ഷത്തിലേറെ പേര്‍ക്കു രോഗബാധ സ്ഥിരീകരിച്ചിട്ടുണ്ട്. മരണസംഖ്യയില്‍ അമേരിക്കയ്ക്കു പിന്നില്‍ രണ്ടാം സ്ഥാനത്തുള്ളത് ബ്രിട്ടനാണ്. 32,692 പേരാണ് ഇവിടെ മരിച്ചത്. ഇറ്റലിയില്‍ 30,739 പേരും സ്‌പെയിനില്‍ 26,744 പേരും ഫ്രാന്‍സില്‍ 26,643 പേരും മരിച്ചു. ജര്‍മനിയില്‍ 7,667, ബ്രസീലില്‍ 11,701, തുര്‍ക്കിയില്‍ 3,841, ഇറാനില്‍ 6,733, ചൈനയില്‍ 4,663, കാനഡയില്‍ 4,993, പെറുവില്‍ 1,961, ബെല്‍ജിയത്തില്‍ 8,761, നെതര്‍ലാന്‍ഡ്‌സില്‍ 5,510, മെക്‌സിക്കോയില്‍ 3,573, സ്വിറ്റ്‌സര്‍ലാന്‍ഡില്‍ 1,845, ഇക്വഡോറില്‍ 2,145, പോര്‍ച്ചുഗലില്‍ 1,144, സ്വീഡനില്‍ 3,256, അയര്‍ലാന്‍ഡില്‍ 1,467, ഇന്തോനേഷ്യയില്‍ 1,007 എന്നിങ്ങനെയാണ് മരണസംഖ്യ. ഇന്ത്യയ്ക്കു പുറമേ ഈ രാജ്യങ്ങളിലാണ് മരണസംഖ്യ ആയിരം പിന്നിട്ടിരിക്കുന്നത്.

റഷ്യയ്ക്കു പുറമേ ബ്രസീല്‍, ഇന്തോനേഷ്യ, റൊമാനിയ, മെക്‌സിക്കോ എന്നീ രാജ്യങ്ങളില്‍ രോഗവ്യാപനം വര്‍ധിക്കുകയാണ്.