മറയൂര്‍: മറയൂര്‍ പട്ടം കോളനി ഭാഗത്ത് പ്രവര്‍ത്തിക്കുന്ന സരസ്വതി വിദ്യാമന്ദിരം എല്‍ പി സ്‌കൂളിലെ ക്ലാസ് മുറിയില്‍ പഠനം നടന്നു കൊണ്ടിരിക്കുമ്പോള്‍ മൂര്‍ഖന്‍ പാമ്പ് കയറി.
അധ്യാപിക ശബ്ദമുണ്ടാക്കി പാമ്പിനെ ഓടിക്കാന്‍ ശ്രമിച്ചപ്പോള്‍ പത്തി വിടര്‍ത്തി ചീറ്റിയ ശേഷം അടുത്തുള്ള ഓഫീസ് മുറിയിലേക്ക് ഇഴഞ്ഞു കയറി. മുര്‍ഖന്‍ പാമ്പാണെന്ന് മനസ്സിലായതിനെ തുടര്‍ന്ന് ക്ലാസില്‍ പഠനം നടത്തിയിരുന്ന 33 കുട്ടികളെയും സമീപത്തെ സെന്റ്‌മേരീസ് പള്ളിയുടെ കുരിശടിയില്‍ എത്തിച്ച് സുരക്ഷിതരാക്കി.
പിന്നീട് വനം വകുപ്പ് ഉദ്യോഗസ്ഥരെ സ്‌കൂള്‍ അധികൃതര്‍ വിവരം അറിയിക്കുകയും വനപാലകരൂം പ്രദേശത്ത് മൂര്‍ഖന്‍ പാമ്പിനെ പിടികൂടുന്നതില്‍ വൈദഗ്ധ്യമുള്ള ഓട്ടോറിക്ഷ ഡ്രൈവറായ മൂര്‍ത്തിയും എത്തി പാമ്പിനെ ഓഫീസ് മുറിക്കുള്ളില്‍ നിന്നും പിടികൂടുകയായിരുന്നു. പിടികൂടിയ പാമ്പിനെ ചിന്നാര്‍ വന്യജീവി സങ്കേതത്തിലെ കരിമുട്ടി വനമേഖലയില്‍ വിട്ടയച്ചു.
രാവിലെ പതിനൊന്ന് മണിയോടെ മൂര്‍ഖന്‍ പാമ്പ് മുടക്കിയ പഠനം ഉച്ചഭക്ഷണത്തിന് ശേഷമാണ് പുനരാരംഭിച്ചു.