വടകര: ഒരു കിലോ, 200 ഗ്രാം കഞ്ചാവുമായി യുവാവ് എക്‌സൈസ് പിടിയില്‍. ഒഞ്ചിയം പുളിയാറന്റവിട റഹീഷിനെയാണ് (36) എക്‌സൈസ് സി.ഐ കെ.കെ മുരളീധരനും സംഘവും പിടികൂടിയത്. നേരത്തെ കഞ്ചാവ് കേസില്‍ പ്രതിയായ ഇയാളെ എക്‌സൈസ് നിരീക്ഷിച്ചു വരികയായിരുന്നു.
 കഞ്ചാവുമായി മടപ്പള്ളിയിലെത്തിയ ഇയാളെ എക്‌സൈസ് സംഘം കൈയോടെ പിടികൂടുകയായിരുന്നു. പ്ലാസ്റ്റിക് സഞ്ചിയില്‍ പൊതിഞ്ഞ നിലയിലായിരുന്നു കഞ്ചാവ്. മറ്റൊരു ഏജന്റില്‍ നിന്നു കൊണ്ടുവന്നതാണെന്ന് ഇയാള്‍ മൊഴി നല്‍കി. മീന്‍ വില്‍പ്പനക്കാരന്‍ കൂടിയായ റഹീഷ് വടകരയുടെ വിവിധ ഭാഗങ്ങളില്‍ കഞ്ചാവ് വില്‍ക്കാറുണ്ടെന്നു പറയുന്നു. ഇന്‍സ്‌പെക്ടര്‍ കെ.കെ ശ്രീധരന്‍, പ്രിവന്റിവ് ഓഫിസര്‍ കെ.വിജയന്‍, സിവില്‍ എക്‌സൈസ് ഓഫിസര്‍മാരായ സുനീഷ്, അനീഷ് വടക്കേടത്ത്, രാഗേഷ്ബാബു എന്നിവരാണ് സംഘത്തിലുണ്ടായിരുന്നത്.