കായംകുളം: വിദ്യാര്‍ഥിയുടെ ആത്മഹത്യാശ്രമവുമായി ബന്ധപ്പെട്ട് വെള്ളാപ്പള്ളി കോളജ് ഓഫ് എന്‍ജിനിയറിങ്ങിന് മുന്നില്‍ നടക്കുന്ന പ്രതിഷേധം അക്രമാസക്തമായി. എസ്.എഫ്.ഐ നടത്തിവന്ന സമരം ഡി.വൈ.എഫ്.ഐ ഏറ്റെടുക്കുകയായിരുന്നു. സംഘര്‍ഷത്തില്‍ പൊലിസുകാരടക്കം 10 പേര്‍ക്ക് പരുക്കേറ്റു. പരുക്കേറ്റ വിജിന്‍, ജെയിംസ് എന്നിവര്‍ ആശുപത്രിയില്‍ പ്രവേശിപ്പിച്ചു.
രാവിലെ 11ഓടെ കോളജിന് മുന്നിലേക്ക് മാര്‍ച്ച് നടത്തിയ ഡി.വൈ.എഫ്.ഐ പ്രവര്‍ത്തകര്‍ക്കുനേരെ പൊലിസ് ലാത്തിവീശുകയായിരുന്നു.
ശക്തമായ പൊലിസ് കാവല്‍ ഉണ്ടായിട്ടും ബാരിക്കേഡുകള്‍ തകര്‍ത്ത് പ്രവര്‍ത്തകര്‍ കാംപസിനുള്ളില്‍ പ്രവേശിച്ചു.
അതിനിടെ, കോളജിലേക്ക് മാര്‍ച്ച് നടത്താന്‍ എ.ബി.വി.പി പ്രവര്‍ത്തകരുമെത്തി. ബി.ഡി.ജെ.എസ് നേതാവ് സുഭാഷ് വാസുവിന്റെ മേല്‍നോട്ടത്തിലുള്ളതാണ് കോളജ്.
നേരത്തെ കെ.എസ്.യുവും എം.എസ്.എഫും കോളജിന് മുന്നില്‍ സമരം നടത്തിയിരുന്നു. കോളജിലെ രണ്ടാംവര്‍ഷ വിദ്യാര്‍ഥി ആര്‍ഷ് കൈ ഞരമ്പ് മുറിച്ച് ആത്മഹത്യക്ക് ശ്രമിച്ചതാണ് പ്രശ്‌നങ്ങള്‍ക്കിടയാക്കിയത്. മാനേജ്‌മെന്റിന്റെ കടുത്ത പീഡനം മൂലമാണ് ആത്മഹത്യാശ്രമമെന്നാണ് ആരോപണം.