മലപ്പുറം: ഇന്ന് വൈകിട്ട് ആകാശത്ത് അന്താരാഷ്ട്ര ബഹിരാകാശ നിലയത്തെ വ്യക്തമായി കാണാനാകും. മലപ്പുറം അമച്വര്‍ ആസ്‌ട്രോണമേസ് സൊസൈറ്റി പ്രവര്‍ത്തകനായ ഇല്യാസ് പെരിമ്പലമാണ് ഇക്കാര്യം അറിയിച്ചത്. ബഹിരാകാശത്ത് ഏകദേശം 400 കി.മീ. ഉയരത്തില്‍ മണിക്കൂറില്‍ 27600 കി.മീ വേഗത്തില്‍ ഭൂമിയെ ചുറ്റുന്ന പടുകൂറ്റന്‍ കെട്ടിടമാണ് അന്താരാഷ്ട്ര ബഹിരാകാശ നിലയം.
ഇന്ന് വൈകിട്ട് 07.21.47ന് ആകാശത്തിന്റെ തെക്കുപടിഞ്ഞാറു ഭാഗത്തുനിന്ന് അത്യധികം ശോഭയുള്ള നക്ഷത്രത്തെ പോലെ ഉദിച്ചുയരുന്ന ബഹിരാകാശ നിലയം 07.28.28ന് വടക്കുകിഴക്ക് ഭാഗത്ത് അസ്തമിക്കും. മൊത്തം ആറു മിനുട്ട് 41 സെക്കന്‍ഡ് സമയം ഇതു ദര്‍ശിക്കാനാകും. ഇത്തവണ ഇത് ഉച്ചിയിലെത്തുമ്പോള്‍ ഏതാണ്ട് നമ്മുടെ തലയ്ക്ക് മുകളിലൂടെ കടന്നുപോകും.
മൈനസ് 3.3 എന്ന അത്യധികം ഉയര്‍ന്ന കാന്തിമാനത്തോടെയാണ് കടന്നുപോവുക എന്നതിനാല്‍ ഇത്തവണ വളരെയധികം ഭംഗിയുണ്ടാകും. കാലാവസ്ഥ അനുകൂലമെങ്കില്‍ നല്ല ഒരു ദൃശ്യവിരുന്ന് പ്രതീക്ഷിക്കാം. ദിവസവും ഇത് പതിനാറോളം തവണ ഭൂമിയെ ചുറ്റുന്നുണ്ടെങ്കിലും കേരളത്തിന് മുകളിലൂടെ സന്ധ്യയ്‌ക്കോ പുലര്‍ച്ചെയോ കടന്നുപോകുമ്പോള്‍ മാത്രമേ നമുക്കിതിനെ കാണാനാകൂ.
അന്താരാഷ്ട്ര ബഹിരാകാശ നിലയം 92 മിനുട്ട് സമയം കൊണ്ട് ഒരു തവണ ഭൂമിയെ ചുറ്റുന്നുണ്ട്. 16 രാജ്യങ്ങളുടെ സംയുക്ത സംരംഭമായ ഈ നിലയത്തില്‍ സഞ്ചാരികള്‍ വിവിധ പരീക്ഷണങ്ങള്‍ക്കായി എത്താറുണ്ട്. 19 രാജ്യങ്ങളില്‍ നിന്നായി 240 സഞ്ചാരികള്‍ ഇതിനകം ഇവിടെ എത്തിയിട്ടുണ്ട്. നിലയത്തിന് 32,333 ക്യുബിക് അടി വ്യാപ്തവും 400 മെട്രിക് ടണ്‍ ഭാരവുമുണ്ട്.