വഡോദര: ഗുജറാത്തിലെ വഡോദരയില്‍ ഒമ്പതാം ക്ലാസുകാരനെ സ്‌കൂളിലെ ശുചിമുറിയില്‍ കുത്തേറ്റുമരിച്ച നിലയില്‍ കണ്ടെത്തിയ സംഭവത്തില്‍ പത്താംക്ലാസുകാരന്‍ പിടിയില്‍. കൊല്ലപ്പെട്ട വിദ്യാര്‍ഥിയും പിടിയിലായ പത്താംക്ലാസ് വിദ്യാര്‍ഥിയും തമ്മില്‍ സംഭവം നടക്കുന്നതിന്റെ തലേദിവസം തര്‍ക്കം നടന്നതായി സ്‌കൂളിലെ വിദ്യാര്‍ഥികള്‍ പൊലിസിന് മൊഴി നല്‍കിയിട്ടുണ്ട്. ഇതിന്റെ അടിസ്ഥാനത്തിലാണ് വിദ്യാര്‍ഥിയെ പൊലിസ് പിടികൂടിയതെന്നാണ് അറിയുന്നത്.

വഡോദരയിലെ ശ്രീ ഭാരതി വിദ്യാലയത്തിലെ ദേവ് തദ്‌വിയെയാണ് മരിച്ചത്. കഴിഞ്ഞ ദിവസമാണ് വയറ്റില്‍ നിരവധി കുത്തുകളേറ്റ നിലയില്‍ 14 വയസുകാരന്റെ മൃതദേഹം കണ്ടെത്തിയത്. സ്‌കൂളിനടുത്ത് ക്ഷേത്രത്തില്‍ നിന്ന് രക്തംപുരണ്ട കത്തിയും മുളകുവെള്ളം നിറച്ച ബോട്ടിലും പൊലിസ് കണ്ടെടുത്തിട്ടുണ്ട്.

ഒരാഴ്ച മുമ്പാണ് കൊല്ലപ്പെട്ട വിദ്യാര്‍ഥി സ്‌കൂളില്‍ ചേര്‍ന്നത്. കഴിഞ്ഞവര്‍ഷം ഗുരുഗ്രാമിലെ റയാന്‍ ഇന്റര്‍നാഷണല്‍ സ്‌കൂളിലെ പ്രത്യുമാന്‍ താക്കൂറിന്റെ കൊലപാതകത്തിന് സമാനമായ സംഭവമാണിത്.