കൊണ്ടോട്ടി: മലപ്പുറം ലോക്‌സഭ ഉപതെരഞ്ഞെടുപ്പില്‍ കൊണ്ടോട്ടി മണ്ഡലത്തിലെ ബൂത്തുകളിലേക്കുള്ള പോളിങ്ങ് കിറ്റുകള്‍ വിതരണം ചെയ്തു. കൊണ്ടോട്ടി മേലങ്ങാടി ജി.വി.എച്ച്.എസ്.എസില്‍ വച്ചാണ് വോട്ടിങ്ങ് യന്ത്രങ്ങളുടെയും പോളിങ്ങ് സാമഗ്രികളുടെയും വിതരണം നടന്നത്. രാവിലെ പത്തുമുതല്‍ വിതരണം ആരംഭിച്ചു.
മണ്ഡലത്തില്‍ 169 പോളിങ് ബൂത്തുകളാണ് ക്രമീകരിച്ചിരിക്കുന്നത്. ഇതില്‍ 17 ബൂത്തുകള്‍ പ്രശ്‌ന ബാധിത ബൂത്തുകളാണ്. ഇവിടെ കര്‍ശന സുരക്ഷയാണ് ഏര്‍പ്പെടുത്തിയിരിക്കുന്നത്.
മൂന്ന് ബൂത്തുകള്‍ വനിതകളാണ് നിയന്ത്രിക്കുക. കാളോത്ത് ഒന്നാംമൈല്‍ എല്‍.പി സ്‌കൂള്‍, മദ്‌റസയിലെ രണ്ട് ബൂത്തുകളും കോടങ്ങാട് മദ്‌റസയിലെ ബുത്തുമാണ് വനിതകള്‍ നിയന്ത്രിക്കുക. വനിത പൊലിസിനെയാണ് ബൂത്തുകളുടെ സുരക്ഷാ ചുമതലയും ഏല്‍പ്പിച്ചിരിക്കുന്നത്. ആയിരത്തോളം പേരെയാണ് തെരഞ്ഞെടുപ്പ് ജോലിക്കായി മണ്ഡലത്തില്‍ നിയോഗിച്ചിരിക്കുന്നത്.
കൊണ്ടോട്ടി നഗരസഭ, വാഴക്കാട്, മുതുവല്ലൂര്‍, ചീക്കോട്, വാഴയൂര്‍, ചെറുകാവ്, പുളിക്കല്‍ പഞ്ചായത്തുകളാണ് കൊണ്ടോട്ടി മണ്ഡലത്തില്‍ ഉള്‍പ്പെടുന്നത്. മണ്ഡലത്തില്‍ 1,88,339 വോട്ടര്‍മാരാണുളളത്. ഇതില്‍ 93,404 സ്ത്രീകളും 94,935 പുരുഷന്‍മാരുമാണ്.