ശ്രീനഗര്‍: ജമ്മുകശ്മിരിലെ പൂഞ്ച് ജില്ലയില്‍ വീണ്ടും പാക് സൈന്യത്തിന്റെ പ്രകോപനം. പൂഞ്ചിലെ കൃഷ്ണഘാട്ടി സെക്ടറിലെ നാലിടങ്ങളിലായിട്ടാണ് പാക് സൈന്യം വെടിനിര്‍ത്തല്‍ കരാര്‍ ലംഘിച്ച് ആക്രമണം നടത്തിയത്.
ഇന്ത്യന്‍ സൈനിക പോസ്റ്റുകള്‍, ഗ്രാമീണ മേഖലകള്‍ എന്നിവ കേന്ദ്രീകരിച്ചാണ് പാക് സൈന്യം ഇന്നലെ പുലര്‍ച്ചെ 4.30 മുതല്‍ ആക്രമണം നടത്തിയത്. മോര്‍ട്ടാര്‍ ഷെല്ലിങിന് പുറമെ തോക്കുകള്‍ ഉപയോഗിച്ചുമാണ് പാക് സൈന്യം ആക്രമണം നടത്തിയത്. ഇതേ തുടര്‍ന്ന് ഇന്ത്യ ശക്തമായ തിരിച്ചടിയാണ് നടത്തിയത്. ഇരു സൈന്യവും തമ്മില്‍ മൂന്ന് മണിക്കൂറിലധികം പരസ്പരം ആക്രമണം നടത്തിയതായി പ്രതിരോധ വക്താവ് അറിയിച്ചു.

ആക്രമണത്തില്‍ ആര്‍ക്കും പരുക്കേറ്റിട്ടില്ല, കഴിഞ്ഞ ശനിയാഴ്ചയും ഗ്രാമീണ മേഖല കേന്ദ്രീകരിച്ച് പാക് സൈന്യം ആക്രമണം നടത്തിയിരുന്നു. രജൗറിയിലെ സുന്ദര്‍ബാനി മേഖലയിലായിരുന്നു പാക് ആക്രമണം.