മലപ്പുറം: യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടിക്കു പാണക്കാട് സ്‌കൂളിലാണ് വോട്ട്. ബി.ജെ.പി സ്ഥാനാര്‍ഥി അഡ്വ. എന്‍. ശ്രീപ്രകാശ് പാണ്ടിക്കാട് വെട്ടിക്കാട്ടിരി ജി.എല്‍.പി സ്‌കൂളിലാണ് വോട്ട് രേഖപ്പെടുത്തുക.
എന്നാല്‍, എല്‍.ഡി.എഫ് സ്ഥാനാര്‍ഥി എം.ബി ഫൈസല്‍ മലപ്പുറം മണ്ഡലക്കാരനല്ലാത്തതിനാല്‍ ഇത്തവണ വോട്ടില്ല. പൊന്നാനി ലോക്‌സഭാ മണ്ഡലത്തിലെ ചങ്ങരംകുളത്താണ് ഫൈസലിന്റെ വീട്. മുസ്‌ലിംലീഗ് സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍, ജില്ലാ പ്രസിഡന്റ് സാദിഖലി ശിഹാബ് തങ്ങള്‍ എന്നിവര്‍ പാണക്കാട് സി.കെ.എം എല്‍.പി സ്‌കൂളില്‍ വോട്ട് രേഖപ്പെടുത്തും. സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ക്കു മുണ്ടിലാക്കല്‍ ഇ.എം.എല്‍.പി സ്‌കൂളിലാണ് വോട്ട്. സമസ്ത ജനറല്‍ സെക്രട്ടറി കെ. ആലിക്കുട്ടി മുസ്്‌ലിയാര്‍ തിരൂര്‍ക്കാട് എ.എം.എച്ച്.എസ് സ്‌കൂളില്‍ വോട്ടുചെയ്യും. മുസ്‌ലിംലീഗ് സംസ്ഥാന സെക്രട്ടറി കെ.പി.എ മജീദിന് പടപ്പറമ്പ് കുടുംബശ്രീ ഓഫിസിലും ജില്ലാ സെക്രട്ടറി കെ.എന്‍.എ ഖാദറിനു ചെമ്മങ്കടവ് പാലക്കല്‍ ജി.എല്‍.പി സ്‌കൂളിലുമാണ് വോട്ട്. സ്പീക്കര്‍ ശ്രീരാമകൃഷ്ണന്‍ പെരിന്തല്‍മണ്ണ നഗരസഭയിലെ കാദര്‍മൊല്ല മെമ്മോറിയല്‍ യു.പി സ്‌കൂളിലും സി.പി.എം ജില്ലാ സെക്രട്ടറി പി.പി വാസുദേവന്‍ വള്ളുവനാട് വിദ്യാഭവന്‍ എല്‍.പി സ്‌കൂളിലും വോട്ടു രേഖപ്പെടുത്തും.