കാഞ്ഞങ്ങാട്: ബഡ്‌സ് സ്‌കൂളിനായി നിര്‍മിക്കുന്ന കെട്ടിടം തകര്‍ന്നു രണ്ടു നിര്‍മാണ തൊഴിലാളികള്‍ക്കു പരുക്കേറ്റു. പൂടംകല്ല് സി.എച്ച്.സിക്ക് സമീപം നിര്‍മിക്കുന്ന കെട്ടിടമാണ് ഇന്നലെ രാവിലെ തകര്‍ന്നത്. കര്‍ണാടക ഹാവേരിയിലെ ധര്‍മ്മ (20), ചെന്നപ്പ (21) എന്നിവര്‍ക്കാണു പരുക്കേറ്റത്. ഇവരെ ജില്ലാ ആശുപത്രിയില്‍ പ്രവേശിപ്പിച്ചു. പരുക്ക് സാരമുള്ളതല്ല.
കെട്ടിടത്തിന്റെ പ്രധാന കോണ്‍ക്രീറ്റ് നിര്‍മാണം നടന്നു കൊണ്ടിരിക്കെയാണു പലകയും കമ്പിയും ഒന്നടങ്കം നിലം പൊത്തിയത്. നിര്‍മാണത്തിലെ അപാകതയാണ് തകരാന്‍ കാരണമെന്നു നാട്ടുകാര്‍ ആരോപിച്ചു.
കെട്ടിടത്തില്‍ സ്ഥാപിച്ച തൂണുകള്‍പോലും ശരിയായ രീതിയിലല്ലെന്നു നേരത്തെ തന്നെ പരാതി ഉയര്‍ന്നിരുന്നു. പ്രധാന സ്ലാബിന്റെ കോണ്‍ക്രീറ്റിനായി നിരത്തിയ കമ്പികള്‍ ശരിയായ രീതിയില്‍ യോജിപ്പിച്ചിട്ടില്ലെന്ന പരാതിയും നാട്ടുകാര്‍ ഉന്നയിക്കുന്നു.