തൊടുപുഴ : കുട്ടക്കാനം മരിയന്‍ കോളജ് ഹോസ്റ്റല്‍ മെസ്സില്‍ നിന്നും ഭക്ഷണം കഴിച്ച വിദ്യാര്‍ഥികള്‍ക്ക് ഭക്ഷ്യ വിഷബാധ, വാര്‍ഡനടക്കം 14 പേര്‍ ചികിത്സയില്‍.
കോളജിന്റെ മെസ്സില്‍ നിന്നും പഴകിയ മീനും ഇറച്ചിയും കഴിച്ച വിദ്യാര്‍ഥികള്‍ക്ക് ചര്‍ദ്ദി, തലകറക്കം, വയറിളക്കം, ശരിരമാസകലം ചൊറിച്ചില്‍ എന്നിവ കണ്ടത്തിയതിനെ തുടര്‍ന്നാണ് മുണ്ടക്കയം മുപ്പത്തിയഞ്ചാം മൈലിലെ സ്വകാര്യാശുപത്രിയില്‍ ചികില്‍സ തേടിയത്. ഹോസ്റ്റല്‍ മെസ്സില്‍ പൊലിസ് നടത്തിയ റെയ്ഡില്‍ ആഴ്ചകള്‍ പഴക്കമുളള പച്ചമീന്‍ പിടിച്ചെടുത്തിട്ടുണ്ട്. മീന്‍ കേടാകാതിരിക്കാന്‍ രാസപദാര്‍ത്ഥം ഉപയോഗിച്ചിട്ടുണ്ടോയെന്നറിയാന്‍ പരിശോധന നടത്താന്‍ ഭക്ഷ്യ സുരക്ഷാ വകുപ്പിനോട് ആവശ്യപ്പെട്ടിട്ടുണ്ടെന്ന് പീരുമേട് സി.ഐ.ഷിബുകുമാര്‍ പറഞ്ഞു.
കഴിഞ്ഞ നാലു ദിവസമായി വിദ്യാര്‍ഥികള്‍ക്ക് അവശത അനുഭവപ്പെടുന്നുണ്ടായിരുന്നു. ആദ്യ ദിനം ആറുപേരും, ഇന്നലെ എട്ടുപേരുമാണ് ചികിത്സ തേടിയെത്തിയത്. വിദ്യാര്‍ഥികളായ അടിമാലി പുളിക്കല്‍ എസ് വേണുഗോപാല്‍, കോട്ടയം പയ്യാനിനിരപ്പേല്‍ ബെന്‍സണ്‍ ബിജു, ആലപ്പുഴ ഒട്ടിങ്കല്‍ ഷെരോണ്‍ ജോര്‍ജുകുട്ടി, കോട്ടയം കളത്തിപറമ്പില്‍ ലെവിന്‍ മാത്യു, കോട്ടയം വെളളാപ്പളളികുന്നേല്‍ ഗോപിക, കുമളി പൊരുന്നോലില്‍ ജിസ്സന്‍ മെരിയ ജോസ്, തീക്കോയി മുകളയില്‍ മരിയ ബേബിച്ചന്‍, എറണാകുളം പാണത്തിപറമ്പില്‍ നെഫിയ അഷറഫ്, കുമളി കണ്ടത്തിങ്കര തെരേസ്സ ജെയിംസ്, ചെങ്ങന്നൂര്‍ കൊട്ടത്തറയില്‍ ആനി ജോണ്‍, ഇടുക്കി പുത്തന്‍പുരയില്‍ ലിബിന ജോസഫ്, മലപ്പുറം ആതിരകുളങ്ങര ലെയോണ, കൊല്ലം റെനുഭവന്‍ റിങ്കു രാജന്‍, ഹോസ്റ്റല്‍ വാര്‍ഡന്‍ കുട്ടിക്കാനം ചാരുപ്ലാക്കല്‍ ബ്രദര്‍ ജോസഫ് എന്നിവരാണ് ചികില്‍സ തേടിയത്. ചികില്‍സയിലുളളവരുടെ നില ഗുരുതരമല്ലന്ന് ഡോക്ടര്‍മാര്‍ അറിയിച്ചു.
എന്നാല്‍ നൂറുകണക്കിനു കുട്ടികള്‍ താമസിക്കുന്ന ഹോസ്റ്റലില്‍ ഇനിയും കൂടുതല്‍ പേര്‍ ചികില്‍സ തേടാനിടയുളളതായി സൂചനയുണ്ട്. ഭക്ഷ്യ വിഷബാധയേറ്റു ചികില്‍സ തേടിയെത്തിയതറിഞ്ഞു പെരുവന്താനം എസ്.ഐ.നാരായണപിളളയുടെ നേതൃത്വത്തില്‍ പൊലിസെത്തി. വിവരമറിഞ്ഞു മാധ്യമ പ്രവര്‍ത്തകരും പൊതുപ്രവര്‍ത്തകരും സ്ഥലത്തെത്തിയതോടെ ചികില്‍സയിലുളള കുട്ടികളെ കാണാന്‍ ആശുപത്രി അധികൃതര്‍ സമ്മതിക്കാതിരുന്നത് നേരിയ വാക്കേറ്റത്തിനിടയാക്കി. കോളജ് അധികൃതര്‍ നേരിട്ട് നടത്തുന്ന ഹോസ്റ്റലിലുണ്ടായ ഭക്ഷ്യ വിഷബാധയുമായി ബന്ധപെട്ടു പൊലിസ് കേസെടുത്ത് അന്വേഷണം ആരംഭിച്ചതായി സി.ഐ.അറിയിച്ചു.