പത്തനംതിട്ട: പെരുന്തേനരുവി ഡാമിന്റെ ഷട്ടറുകള്‍ തുറന്നു വിട്ട സംഭവത്തില്‍ ഡാം സുരക്ഷ അതോറിറ്റി കെ.എസ്.ഇ.ബിയോട് റിപ്പോര്‍ട്ട് തേടി. പൊലിസും ഡാം സുരക്ഷാ അതോറിറ്റിയും ഫൊറന്‍സിക് വിദഗ്ധരും പെരുന്തേനരുവിയില്‍ പരിശോധന നടത്തി.

ഷട്ടര്‍ തുറന്നത് വ്യക്തമായി അറിയാവുന്നവരാണെന്നാണ് കെ.എസ്.ഇ.ബിയുടെ നിഗമനം. ഇതുമായി ബന്ധപ്പെട്ട് അട്ടിമറി സാധ്യതയും അന്വേഷിക്കുമെന്ന് കെ.എസ്.ഇ.ബി എക്‌സിക്യൂട്ടീവ് എഞ്ചിനീയര്‍ അറിയിച്ചു.

കഴിഞ്ഞ ദിവസം രാത്രി പത്തുമണിയോടെയാണ് പെരുന്തേനരുവി ചെറുകിട ജലപദ്ധതിയുടെ ഷട്ടര്‍ സാമൂഹ്യ വിരുദ്ധര്‍ തുറന്ന് വിട്ടത്. ഏഴു മിനുട്ടോളം വെള്ളം പുറത്തേക്കൊഴുകിയതിനെ തുടര്‍ന്ന് കെ.എസ്.ഇ.ബി ജീവനക്കാര്‍ എത്തി ഷട്ടര്‍ അടക്കുകയായിരുന്നു.

വെള്ളപാച്ചില്‍ കണ്ട് പരിസരവാസികള്‍ കെ. എസ്. ഇ.ബി അധികൃതരെ വിവരം അറിയിക്കുകയായിരുന്നു. സംഭവത്തില്‍ പത്തനംതിട്ട ജില്ലാ കലക്ടര്‍ റിപ്പോര്‍ട്ട് തേടിയിട്ടുണ്ട്.