പഴയങ്ങാടി: പഴയങ്ങാടിയിലെ ജ്വല്ലറിയില്‍ മോഷണം നടത്തിയവര്‍ നിരവധി കവര്‍ച്ചാ കേസില്‍ പ്രതികളെന്ന് പൊലിസ്. പത്ത് കവര്‍ച്ചാ കേസുകളില്‍ ഇവര്‍ പ്രതികളാണെന്നും അതിലൊന്ന് മൊട്ടാമ്പ്രത്തെ ജ്വല്ലറിയില്‍ നടത്തിയ മോഷണ ശ്രമവുമാണെന്ന് ചോദ്യം ചെയ്യലില്‍ പ്രതികള്‍ സമ്മതിച്ചു. ഒന്നാം പ്രതി റഫീഖ് പയ്യന്നൂര്‍ പൊലിസ് രജിസ്റ്റര്‍ ചെയ്ത പോക്‌സോ കേസില്‍ പ്രതിയുമാണ്.
പത്ത് കവര്‍ച്ചകളില്‍ നിന്നായി 584 പവന്‍ സ്വര്‍ണവും പത്തര ലക്ഷം രൂപയും എല്‍.സി.ഡി ടി.വി, ലാപ്‌ടോപ്പ്, മൊബൈല്‍ ഫോണുകള്‍, വീട്ടുപകരണങ്ങള്‍ എന്നിവയാണ് ഇവര്‍ നേടിയത്. പഴയങ്ങാടി ജ്വല്ലറിയില്‍നിന്ന് കവര്‍ന്ന 2.8 കിലോഗ്രാം സ്വര്‍ണാഭരണങ്ങളില്‍ 78 നെക്ലേസുകള്‍, 118 ചെയിനുകള്‍, 98 ബ്രേസ്‌ലറ്റുകള്‍, 108 മോതിരങ്ങള്‍, കമ്മല്‍ എന്നിവ ഉള്‍പ്പെടെ മുഴുവന്‍ സ്വര്‍ണവും പ്രതികളുടെ വീടുകളില്‍നിന്ന് കണ്ടെടുത്തതായി എസ്.പി ജി. ശിവവിക്രം മാധ്യമങ്ങളോടു പറഞ്ഞു. കവര്‍ന്ന രണ്ടുലക്ഷം രൂപയില്‍ ഒന്നര ലക്ഷം രൂപയേ കണ്ടെത്താന്‍ കഴിഞ്ഞുള്ളൂ. ബാക്കി അന്‍പതിനായിരം രൂപ ചെലവായതായി പ്രതികള്‍ പൊലിസിനോട് പറഞ്ഞു. നാടിനെ ഞെട്ടിച്ച കവര്‍ച്ച ആറുമാസത്തെ നിരീക്ഷണത്തിനും പഠനത്തിനും ശേഷമാണ് നടത്തിയത്.
നാലോളം ജ്വല്ലറികളിലായി നടത്തിയ നിരീക്ഷണത്തില്‍ ഏറ്റവും എളുപ്പവും ഒരു പൂട്ട് മാത്രമുള്ള ഷട്ടര്‍ ജ്വല്ലറിയുമായ അല്‍ ഫത്തീബി തെരഞ്ഞെടുക്കുകയായിരുന്നു. ഒരു തെളിവുപോലും ബാക്കിവയ്ക്കാതെയുള്ള ആസൂത്രിത കവര്‍ച്ചയില്‍ പ്രതികളെ കണ്ടുപിടിച്ച അന്വേഷണ സംഘത്തെ എസ്.പി പ്രശംസിച്ചു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. തളിപ്പറമ്പ് ഡിവൈ.എസ്.പി കെ.വി വേണുഗോപാല്‍, പഴയങ്ങാടി പ്രിന്‍സിപ്പല്‍ എസ്.ഐ പി.എ ബിനുമോഹനന്‍, മറ്റ് അന്വേഷണ ഉദ്യോഗസ്ഥരും വാര്‍ത്താസമ്മേളനത്തില്‍ പങ്കെടുത്തു.