ദുബൈ: ദുബൈ ഷോപ്പിങ് ഫെസ്റ്റിവലി (ഡി.എസ്.എഫ്)ന്റെ പുതിയ എഡിഷൻ തീയതികൾ പ്രഖ്യാപിച്ചു. ഡിസംബർ ആറിനാരംഭിച്ച് ജനുവരി 12 വരെ നീണ്ടുനിൽക്കുന്നതായിരിക്കും ദുബൈയുടെ ഈ ചരിത്ര വ്യാപാരോത്സവം. ഡി.എസ്.എഫിന്റെ 30-ാം വാർഷിക പതിപ്പാണിത്. ഷോപ്പിങ് ഫെസ്റ്റിവലിൽ തത്സമയ സംഗീത പരിപാടികളും, കലാ-സാംസ്കാരിക പ്രകടനങ്ങളും വിലക്കിഴിവോടെയുള്ള വ്യാപാര മേളകളും ഉൾപ്പെടെ മൊത്തം 321 പ്രോഗ്രാമുകളാണ് ഇത്തവണ ആസൂത്രണം ചെയ്തിരിക്കുന്നതെന്നും ലോകോത്തര കലാകാരന്മാരും സംഗീതജ്ഞരും താര പ്രതിഭകളും എത്തുമെന്നും സംഘാടകരായ ദുബൈ ഫെസ്റ്റിവൽസ് ആൻഡ് റീടെയിൽ എസ്റ്റാ ബ്ലിഷ്മെന്റ് (ഡി എഫ്.ആർ.ഇ) അധികൃതർ അറിയിച്ചു.

 1,000ത്തിലധികം ആഗോള പ്രാദേശിക ബ്രാൻഡുകളിൽ നിന്നുള്ള എക്കാലത്തെയും വലിയ ഷോപ്പിങ് ഡീലുകൾ ഇത്തവണ പ്രതീക്ഷിക്കാം. സന്ദർശകർക്ക് ഉത്സവ അനുഭവങ്ങൾ, അവിസ്മരണീയമായ പുതുവത്സര ആഘോഷങ്ങൾ, തീം പാർക്കുകളിലേക്കുള്ള യാത്രകൾ, ഔട്ട്ഡോർ അഡ്വെഞ്ചർ ട്രിപ്പുകൾ, കടൽത്തീര ഉല്ലാസ പ്രോഗ്രാമുകൾ, ജീവിതം മാറ്റിമറിക്കുന്ന സമ്മാനങ്ങൾ തുടങ്ങി അനേകം വ്യത്യസ്‌തകളാണ് ഈ വർഷത്തെ ഡി.എസ്.എഫിന്റെ സവിശേഷതകൾ.

 38 ഉത്സവ ദിന രാത്രങ്ങളിൽ സന്ദർശകർക്ക് കരിമരുന്ന് പ്രയോഗങ്ങൾ, ലോകോത്തര ഡ്രോൺ പ്രദർശനങ്ങൾ, ദുബൈലൈറ്റ്ഷോ എന്നിവ സൗജന്യമായി കാണാനാകും. യു.എ.ഇയുടെ ശൈത്യകാല മാസങ്ങളിൽ ഉത്സവം എങ്ങനെ പരമാവധി പ്രയോജനപ്പെടുത്താം എന്നതിനെക്കുറിച്ചുള്ള സമഗ്രമായ ഗൈഡ് പ്രദർശിപ്പിക്കുന്ന ഡി.എസ്.എഫ് പരിപാടികളുടെ മുഴുവൻ കലണ്ടറും ഉടൻ പുറത്തിറക്കുമെന്നും സ ഘാടകർ വ്യക്തമാക്കി.

🪀 കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക