ആലപ്പുഴ: ചെങ്ങന്നൂരില്‍ വാഹനാപകടത്തില്‍ നാലു പേര്‍ മരിച്ചു. കെ.എസ്.ആര്‍.ടി.സിയും മിനി ലോറിയും കൂട്ടിയിടിച്ചാണ് അപകടമുണ്ടായത്. ചെങ്ങന്നൂരിലെ മുളക്കുഴയിലാണ് അപകടം. ആലപ്പുഴ സ്വദേശികളായ സജീവ്, ബാബു, ആസാദ്, കെ.ബാബു എന്നിവരാണ് മരിച്ചത്. മരിച്ചവരില്‍ മൂന്നു പേരുടെ മൃതദേഹം ചെങ്ങന്നൂര്‍ സെഞ്ചുറി ആശുപത്രിയിലും ഒരെണ്ണം താലൂക്ക് ആശുപത്രിയിലും സൂക്ഷിച്ചിരിക്കുകയാണ്.

അപകടത്തില്‍ അഞ്ചു പേര്‍ക്ക് പരുക്കേറ്റിട്ടുമുണ്ട്. കെ.എസ്.ആര്‍.ടി.സി ബസ്സിലുള്ളവര്‍ക്കാണ് പരുക്കേറ്റത്. രാവിലെ ആറോടയാണ് അപകടമുണ്ടായത്. ചെങ്ങന്നൂരില്‍ നിന്ന് പത്തനംതിട്ടയിലേക്ക് പോവുകയായിരുന്ന ബസ്സും ചെങ്ങന്നൂര്‍ ഭാഗത്തേക്ക് വരികയായിരുന്ന ലോറിയുമാണ് കൂട്ടിയിടിച്ചത്.

അപകടസ്ഥലത്ത് വച്ച് തന്നെ മൂന്നു പേര്‍ മരിച്ചു. ഒരാള്‍ ആശുപത്രിയില്‍ വച്ചുമാണ് മരിച്ചത്. മിനി ലോറിയില്‍ യാത്ര ചെയ്തിരുന്നവരാണ് മരിച്ചത്.