തെന്മല: ജനവാസകേന്ദ്രത്തില്‍ അനധികൃത വെടിമരുന്ന് സംഭരണശാലയ്ക്ക് അനുമതി നല്‍കാന്‍ ഭരണസമിതിയിലെ ഒരു വിഭാഗം ശ്രമിക്കുന്നതായി ഡി.സി.സി ജനറല്‍ സെക്രട്ടറിയും പഞ്ചായത്ത് സ്ഥിരംസമിതി അധ്യക്ഷനുമായ കെ. ശശിധരനും കോണ്‍ഗ്രസ് മണ്ഡലം പ്രസിഡന്റ് ആര്‍. സുഗതനും പത്രസമ്മേളനത്തില്‍ ആരോപിച്ചു.
കഴിഞ്ഞ നാലു വര്‍ഷമായി തൊഴിലുറപ്പ് പദ്ധതിയുമായി താതൊരു ബന്ധവുമില്ലാത്ത എസ്റ്റേറ്റിലെ സ്ഥിരം ജീവനക്കാരിയെ മേറ്റ് ആയി പ്രവര്‍ത്തിപ്പിച്ചുകൊണ്ട് സ്വജനപക്ഷപാതവും അഴിമതിക്ക് കൂട്ടിനില്‍ക്കുന്നവരുമാണ് ഇപ്പോഴത്തെ തെന്മല പഞ്ചായത്തിലെ ഭരണസമിതി.
യു.ഡി.എഫ് ഭരണസമിതി നടപ്പിലാക്കിയ വികസനപ്രവര്‍ത്തനങ്ങളെല്ലാം തങ്ങളുടേതാക്കി മാറ്റാനുള്ള ശ്രമമാണ് ഇപ്പോള്‍ നടത്തുന്നതെന്നും ഇവര്‍ ആരോപിച്ചു.