ന്യൂഡല്‍ഹി: കൊവിഡ് വ്യാപനവും ലോക്ക്ഡൗണും കാരണം ദുരിതത്തിലായ അതിഥി തൊഴിലാളികളുടെ പ്രശ്‌നത്തില്‍ ഇടപെട്ട് സുപ്രിംകോടതി.
വിവിധ സംസ്ഥാനങ്ങളില്‍ തൊഴിലാളികള്‍ നേരിടുന്ന പ്രയാസങ്ങള്‍ പരിഹരിക്കുന്നതിന് എന്തൊക്കെ ചെയ്‌തെന്ന് സര്‍ക്കാരുകള്‍ അറിയിക്കണമെന്നാണ് സുപ്രിംകോടതി ഇന്നലെ നിര്‍ദേശിച്ചിരിക്കുന്നത്.
വിഷയത്തില്‍ കേന്ദ്ര, സംസ്ഥാന സര്‍ക്കാരുകള്‍ക്ക് വീഴ്ചപറ്റിയതായും കോടതി വാക്കാല്‍ പരാമര്‍ശിച്ചു.
ലോക്ക്ഡൗണ്‍ കാരണം പ്രയാസത്തിലായ തൊഴിലാളികളുടെ ദുരിതമകറ്റാന്‍ എന്തൊക്കെ നടപടികള്‍ സ്വീകരിച്ചെന്ന് കേന്ദ്ര, സംസ്ഥാന സര്‍ക്കാരുകളും കേന്ദ്രഭരണ പ്രദേശങ്ങളും അറിയിക്കണമെന്നാണ് ഇന്നലെ സുപ്രിംകോടതി നിര്‍ദേശിച്ചത്.
വിഷയത്തില്‍ സര്‍ക്കാരുകള്‍ക്കു കോടതി നോട്ടിസയച്ചിട്ടുണ്ട്. ഇതുമായി ബന്ധപ്പെട്ട ഹരജി കോടതി നാളെ വീണ്ടും പരിഗണിക്കും.
ഇതേസമയം, കൊവിഡ് പ്രതിസന്ധിയെ തുടര്‍ന്ന് മൊറൊട്ടോറിയം പ്രഖ്യാപിച്ച ലോണുകളില്‍ മൊറൊട്ടോറിയം പ്രഖ്യാപിച്ച കാലയളവിലെ പലിശ ഈടാക്കരുതെന്നാവശ്യപ്പെട്ടുള്ള ഹരജിയില്‍ കോടതി കേന്ദ്രസര്‍ക്കാരിന്റെയും റിസര്‍വ് ബാങ്കിന്റെയും വിശദീകരണം തേടിയിട്ടുണ്ട്.
നേരത്തെ മൂന്നു മാസത്തെ മൊറൊട്ടോറിയം പ്രഖ്യാപിച്ചിരുന്നത് പിന്നീട് മൂന്നു മാസത്തേക്കു കൂടി നീട്ടിയിരുന്നു. ഈ കേസ് അടുത്തയാഴ്ച കോടതി വീണ്ടും പരിഗണിക്കും.