കാഞ്ഞങ്ങാട്: ആള്‍ താമസമില്ലാത്ത പറമ്പില്‍ കുഴിമാടം പോലെ മണ്‍കൂന പ്രത്യക്ഷപ്പെട്ടു. വിവരമറിഞ്ഞ് സ്ഥലത്തെത്തിയ പൊലിസ് സംഘം ഇവിടെ മണ്ണ് മാന്തിയെങ്കിലും കിട്ടിയത് നാലാള്‍ കൂടിയാല്‍ പൊങ്ങാത്ത ഉരുളന്‍ കല്ലും, സൈക്കിള്‍ ടയറിനകത്തിടുന്ന ട്യൂബുകളും, ഓലകളും. കഴിഞ്ഞ ദിവസം വൈകിട്ടാണ് പെരിയ മുത്തനടുക്കത്ത് നാടകീയ സംഭവങ്ങള്‍ അരങ്ങേറിയത്. മുത്തനടുക്കം ബസ് കാത്തിരുപ്പ് കേന്ദ്രത്തിന് സമീപത്തുള്ള ആള്‍ താമസമില്ലാത്ത പറമ്പിലാണ് കുഴിമാടം പോലെയുള്ള കുഴി നാട്ടുകാരുടെ ശ്രദ്ധയില്‍ പെട്ടത്. ഇതില്‍ ദുരൂഹത തോന്നിയ നാട്ടുകാര്‍ ഉടനെ വിവരം ബേക്കല്‍ പൊലിസിനെ അറിയിച്ചു.രാത്രി വൈകുംവരെ കുഴിയിലെ മണ്ണ് നീക്കല്‍ ജോലി തുടര്‍ന്നെങ്കിലും ഒന്നും കണ്ടെത്താനായില്ല. അതേ സമയം ഇവിടെ നിന്നും നിധി കണ്ടെത്തുകയും അതെടുക്കാന്‍ വേണ്ടി കുഴി കുത്തുകയും ചെയ്തതായി സംശയിക്കുന്നതായും ചിലര്‍ പറയുന്നു. സംഭവം സംബന്ധിച്ച് അന്വേഷണം നടത്തി വരുന്നതായി ബേക്കല്‍ പൊലിസ് പറഞ്ഞു.