തെല്‍അവീവ്: വെസ്റ്റ് ബാങ്കില്‍ കഴിഞ്ഞദിവസമുണ്ടായ ആക്രമണത്തില്‍ ഗുരുതരമായി പരുക്കേറ്റ ജൂതപുരോഹിതന്‍ കൊല്ലപ്പെട്ടു.

നിയമവിരുദ്ധ ജൂതകുടിയേറ്റ കേന്ദ്രത്തില്‍ വസിക്കുന്ന അഷിഹാദ് എത്തിന്‍ഗര്‍ ആണ് മരിച്ചത്. ഞായറാഴ്ച രാവിലെ ജൂതകുടിയേറ്റ കേന്ദ്രത്തിലെത്തിയ ഫലസ്തീനി കൗമാരക്കാരന്‍ ഇവിടെയുണ്ടായിരുന്ന ഇസ്‌റാഈലി സൈനികനെ കത്തികൊണ്ട് ആക്രമിച്ച ശേഷം തോക്ക് തട്ടിപ്പറിച്ചെടുത്താണ് വെടിവയ്പ് നടത്തിയത്. കുത്തേറ്റ സൈനികന്‍ തല്‍ക്ഷണം മരിച്ചിരുന്നു. ആക്രമണത്തില്‍ പുരോഹിതനുള്‍പ്പെടെ രണ്ടുപേര്‍ക്കു പരുക്കേറ്റു. ചികില്‍സയില്‍ കഴിയവെ ഇന്നലെ രാവിലെയാണ് പുരോഹിതന്‍ മരിച്ചത്. വെടിവയ്പ് നടത്തിയ ഉടന്‍ ഫലസ്തീനി മറ്റൊരുകാറില്‍ കടന്നുകളയുകയായിരുന്നു. ഇദ്ദേഹത്തെ ഇതുവരെ പിടികൂടുകയോ തിരിച്ചറിയുകയോ ചെയ്തിട്ടില്ല.