മ്യൂണിക്ക്: സീസണില്‍ നിറം മങ്ങിയ ഫോമിലാണ് ക്രിസ്റ്റ്യാനോ റൊണാള്‍ഡോ ബയേണ്‍ മ്യൂണിക്കിനെതിരേ കളിക്കാനിറങ്ങിയത്. ഒപ്പം ക്രിസ്റ്റ്യാനോയ്‌ക്കെതിരേ റയലിലെ സഹ താരങ്ങള്‍ കലാപക്കൊടി ഉയര്‍ത്തിയതായും മറ്റും വാര്‍ത്തകളും പ്രചരിക്കുന്നുണ്ടായിരുന്നു. എന്നാല്‍ എണ്ണം പറഞ്ഞ രണ്ടു ഗോളുകള്‍ അതിന്റെയെല്ലാം ക്ഷീണം തീര്‍ക്കാന്‍ പാകത്തിലായിരുന്നു. ബയേണിനെതിരേ പോര്‍ച്ചുഗല്‍ നായകന്‍ നേടിയ രണ്ടു ഗോളുകള്‍ ചരിത്രത്തിന്റെ ഭാഗമാണിനി. യൂറോപ്യന്‍ മത്സരങ്ങളില്‍ 100 ഗോളുകള്‍ പൂര്‍ത്തിയാക്കുന്ന ആദ്യ താരമെന്ന റെക്കോര്‍ഡ് ക്രിസ്റ്റ്യാനോയ്ക്ക് സ്വന്തം. ബയേണിനെതിരേ കളിക്കാനിറങ്ങുമ്പോള്‍ അക്കൗണ്ടില്‍ 98 ഗോളുകളായിരുന്നു താരത്തിന്റെ പേരിലുണ്ടായിരുന്നത്. ഇരട്ട ഗോളോടെ ക്രിസ്റ്റ്യാനോ ആ റെക്കോര്‍ഡ് സ്വന്തമാക്കി. 97 ഗോളുകളുമായി ലയണല്‍ മെസ്സി രണ്ടാമത് നില്‍ക്കുന്നു.
2005ല്‍ മാഞ്ചസ്റ്റര്‍ യുനൈറ്റഡിനായി കളിക്കുന്ന കാലത്ത് ചാംപ്യന്‍സ് ലീഗ് യോഗ്യതാ പോരാട്ടത്തില്‍ ഹംഗേറിയന്‍ ക്ലബ് ഡെബ്രെസനെതിരേ ഗോള്‍ നേടി തുടങ്ങിയ കുതിപ്പ് ബയേണിനെതിരായ ഇരട്ട ഗോളില്‍ എത്തി നില്‍ക്കുന്നു. റയലിനായി 84 ഗോളുകളും മാഞ്ചസ്റ്റര്‍ യുനൈറ്റഡിനായി 16 ഗോളുകളുമാണ് ക്രിസ്റ്റ്യാനോ സ്വന്തമാക്കിയത്. 140 മത്സരങ്ങളില്‍ നിന്നാണ് ക്രിസ്റ്റ്യാനോ ഗോള്‍ നേട്ടം ശതകത്തിലെത്തിച്ചത്.
ചാംപ്യന്‍സ് ലീഗില്‍ 97ഉം സൂപ്പര്‍ കപ്പില്‍ രണ്ടും യോഗ്യതാ പോരാട്ടത്തില്‍ ഒരു ഗോളുമാണ് പോര്‍ച്ചുഗല്‍ നായകന്‍ അടിച്ചത്. ഹോം പോരാട്ടങ്ങളില്‍ 49 തവണയും എവേയില്‍ 47 തവണയും സംയുക്ത വേദിയില്‍ നാലു തവണയുമായി വല ചലിപ്പിച്ചു. ഇടം കാല്‍ കൊണ്ട് 16 ഗോളുകളും വലം കാല്‍ കൊണ്ട് 69 ഗോളുകളും ഹെഡ്ഡറിലൂടെ 15 ഗോളുകളുമാണ് സമ്പാദ്യം. ബോക്‌സിനകത്തു വച്ച് 83 തവണയും പുറത്തു വച്ച് 17 തവണയും പെനാല്‍റ്റിയിലൂടെ 11 തവണയും ക്രിസ്റ്റ്യാനോ സ്‌കോര്‍ ചെയ്തു.