ന്യൂഡല്‍ഹി: വിഘടനവാദി നേതാവ് ബുര്‍ഹാന്‍ വാണി കൊല്ലപ്പെട്ടതിനെത്തുടര്‍ന്നു കശ്മിരില്‍ നടക്കുന്ന പ്രതിഷേധങ്ങളില്‍ സമരക്കാരുടെ ജീവന്‍ നഷ്ടപ്പെടുന്ന തരത്തില്‍ സുരക്ഷാസേന ആയുധം പ്രയോഗിക്കുന്നത് ക്രൂരവും അപലപനീയവുമാണെന്ന് സി.പി.എം. താഴ്‌വരയിലെ വഷളായിക്കൊണ്ടിരിക്കുന്ന സ്ഥിതിഗതികളില്‍ ആശങ്ക രേഖപ്പെടുത്തുന്നതായി പോളിറ്റ്ബ്യൂറോ പുറത്തിറക്കിയ പ്രസ്താവനയില്‍ പറഞ്ഞു. കശ്മിരില്‍ ഇപ്പോള്‍ നടക്കുന്ന പ്രക്ഷോഭങ്ങളില്‍ ഇതുവരെ കൊല്ലപ്പെട്ട 25ലധികം വരുന്നവരില്‍ ബഹുഭൂരിഭാഗവും യുവാക്കളാണ്. പ്രക്ഷോഭകാരികള്‍ക്ക് നേരെ ഇത്തരത്തില്‍ അമിതമായ തരത്തില്‍ ആയുധം പ്രയോഗിക്കുന്നതില്‍ നിന്ന് ഭരണകൂടം പിന്‍തിരിയണമെന്നും നിരായുധരും നിരപരാധികളുമായ പ്രതിഷേധക്കാരെ വധിച്ചവരെ കണ്ടെത്തുകയും ശിക്ഷിക്കുകയും വേണം. കേന്ദ്രതലത്തില്‍ ആഭ്യന്തരമന്ത്രി രാജ്‌നാഥ് സിങ് എത്രയും പെട്ടെന്ന് സര്‍വകക്ഷി യോഗം വിളിക്കണമെന്നും പ്രസ്താവനയില്‍ ആവശ്യപ്പെട്ടു.