മാങ്ങാച്ചുന മണമുള്ള മീനത്തില്‍
മിന്നലായ് മാനത്തിന്റെ കണ്ണേറ്
തുടിയുടെ താളമുള്ള മേടത്തില്‍
ഇടമഴയോര്‍മിപ്പിച്ച്
വേനലിന്റെ കണ്ണീര്..
മഴവില്ലില്‍ വെയില്‍ കുടഞ്ഞിട്ട്
മയില്‍പ്പീലി പെറുക്കി
അവധിക്കിടാങ്ങളുടെ
ആഘോഷത്തിമര്‍പ്പ്..
കുസൃതിക്കരുത്തില്‍ കുരുത്തോല തൂക്കി
പെസഹ
ഉയിര്‍ത്തെഴുന്നേല്‍പ്പിന്റെ
ഉറപ്പില്‍ ദുഃഖ വെള്ളി..
പള്ളിക്കൂട വടിയും
പാഠപുസ്തകങ്ങളുമില്ലാത്ത
ആഘോഷത്തില്‍
മാസ്റ്ററായൊരീസ്റ്റര്‍..
മഞ്ഞക്കൊന്നയും
കണിവെള്ളരിയും സ്വര്‍ണമണിഞ്ഞ്
വിഷുപ്പുലരി
മേടരാശിയില്‍ അവധിക്കാലത്തിന്റെ
അവകാശികള്‍ക്ക്
പടക്കത്തിന്റെ ഒച്ചയുള്ള
അച്ചടക്കം
കലണ്ടറിലെ കറുപ്പക്കങ്ങള്‍
ചെമ്പട്ടു ചുറ്റി തെയ്യാട്ടമാടുന്ന
മേളപ്പെരുക്കം.