കോട്ടയം: താഴത്തങ്ങാടി പാറപ്പാടത്ത് വീടിനുള്ളില്‍ ക്രൂരമായ ആക്രമണത്തിനിരയായി വയോധിക ദമ്പതികള്‍. ക്രൂരമായ ആക്രമണത്തിന് ഇരയായ ഭാര്യ മരിച്ചു. ആക്രമണത്തില്‍ പരുക്കേറ്റു തലയില്‍ നിന്നും രക്തവാര്‍ന്ന നിലയില്‍ കണ്ടെത്തിയ ഭര്‍ത്താവിന്റെ നിലഗുരുതരം.
വീടിനുള്ളില്‍ പാചകവാതക സിലിണ്ടര്‍ തുറന്നു വിട്ട നിലയിലായിരുന്നു. പോര്‍ച്ചില്‍ കിടന്ന കാറും കവര്‍ന്നു. താഴത്തങ്ങാടി പാറപ്പാടം ഷാനി മന്‍സില്‍ ഷീബ (60) ആണ് മരിച്ചത്. അതീവഗുരുതരാവസ്ഥയിലായ ഭര്‍ത്താവ് അബ്ദുല്‍സാലി (63) യെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ വൈകിട്ട് 5.30 ഓടെയാണ് വയോധിക ദമ്പതികള്‍ ആക്രമണത്തിന് ഇരയായ വിവരം പുറംലോകം അറിഞ്ഞത്. സാലിയുടെ വാടക വീട് കാണാനെത്തിയ രണ്ടു പേരും വീട്ടില്‍ എത്തിയിരുന്നു. വീട്ടിനുള്ളില്‍ നിന്നും പാചകവാതകത്തിന്റെ ഗന്ധം വന്നതോടെ ഇവര്‍ വിവരം അഗ്‌നിശമന സേനയെ അറിയിക്കുകയായിരുന്നുവെന്ന് പൊലിസ് പറഞ്ഞു. ഇതേസമയം തന്നെ ബന്ധുവും സാലിയുടെ എത്തി. സംഭവസ്ഥലത്ത് എത്തിയ അഗ്‌നിശമന സേനയാണ് വാതില്‍ തുറന്നത്.
മുറിയ്ക്കുള്ളില്‍ ഇരുവരെയും രക്തത്തില്‍ കുളിച്ച നിലയില്‍ കണ്ടെത്തി. ആശുപത്രിയിലേക്കുള്ള യാത്രയ്ക്കിടെ ഷീബ മരിച്ചു. സാലിയുടെ നില ഗുരുതരമാണ്. ജില്ലാ പൊലിസ് മേധാവി ജി. ജയദേവ്, ഡിവൈ.എസ്.പി ആര്‍. ശ്രീകുമാര്‍, ജില്ലാ ക്രൈം ബ്രാഞ്ച് ഡിവൈ.എസ്.പി ഗിരീഷ് പി. സാരഥി, എസ്.ഐ.ടി ശ്രീജിത്ത് എന്നിവരുടെ നേതൃത്വത്തില്‍ അന്വേഷണം തുടങ്ങി.