ഭുവനേശ്വര്‍: അയോധ്യയിലെ രാമക്ഷേത്ര നിര്‍മ്മാണത്തെ അനുകൂലിക്കുന്ന നിരവധി രേഖകളുണ്ടെന്ന് കേന്ദ്ര നിയമമന്ത്രി രവിശങ്കര്‍ പ്രസാദ്. നിയമന്ത്രി എന്ന നിലയില്‍ അല്ല, നിയമ വിദഗ്ധന്‍ എന്ന നിലയിലാണ് താന്‍ ഇത് പറയുന്നതെന്നും മന്ത്രി ചൂണ്ടിക്കാട്ടി. ഭുവനേശ്വറില്‍ ബി.ജെ.പി ദേശീയ എക്‌സിക്യുട്ടീവില്‍ പങ്കെടുക്കാന്‍ എത്തിയതായിരുന്നു അദ്ദേഹം

അയോധ്യയിലെ രാമക്ഷേത്ര നിര്‍മ്മാണം ബി.ജെ.പിയുടെ അജണ്ടയാണ്. കാലങ്ങളായി പാര്‍ട്ടി അജണ്ടയിലുള്ള കാര്യമാണിത്. ഇക്കാര്യത്തില്‍ കോടതി ഉത്തരവിനായി കാത്തിരിക്കുകയാണ് പാര്‍ട്ടിയെന്നും ഉത്തര്‍പ്രദേശിലും കേന്ദ്രത്തിലും അധികാരമുള്ള സാഹചര്യത്തില്‍ നിര്‍മ്മാണത്തെ കുറിച്ചുള്ള മാധ്യമ പ്രവര്‍ത്തകരുടെ ചോദ്യത്തിന് മന്ത്രി മറുപടി നല്‍കി.

ബി.ജെ.പിക്ക് എതിരായി സഖ്യം രൂപീകരിക്കാനുള്ള ബി.എസ്.പി നേതാവ് മായാവതിയുടേയും സമാജ്‌വാദി പാര്‍ട്ടി നേതാവ് അഖിലേഷ് യാദവിന്റേയും നീക്കം അവരുടെ നിരാശയാണ് പ്രതിഫലിപ്പിക്കുന്നതെന്ന് രവിശങ്കര്‍ പ്രസാദ് പരിഹസിച്ചു.

ബി.ജെ.പിയെ ഭയന്നാണ് സഖ്യചര്‍ച്ചകള്‍. പക്ഷെ ബി.ജെ.പിയുടെ പ്രവര്‍ത്തനങ്ങളെ ശരിവെക്കുന്നതാണ് ജനവിധിയെന്നും മന്ത്രി ചൂണ്ടിക്കാട്ടി.