കോവളം : ഉപയോഗശൂന്യമായ കിണറിന്റെ കൈവരിയിലിരിക്കവെ  കാല്‍ വഴുതി ഉള്ളില്‍  വീണ  യുവാവിനെ  ഫയര്‍ഫോഴ്‌സ് രക്ഷപ്പെടുത്തി. കല്ലിയൂര്‍ വട്ടവിള പുത്തന്‍വീട്ടില്‍ അജി (40)യാണ്  അന്‍പതടിയോളം താഴ്ചയുള്ള   കിണറ്റില്‍  വീണത്. കഴിഞ്ഞ ദിവസം രാത്രിലായിരുന്നു സംഭവം. നാട്ടുകാര്‍ രക്ഷാപ്രവര്‍ത്തനം  തുടങ്ങിയെങ്കിലും   വായു സഞ്ചാരം കുറവായിരുന്നതിനാല്‍  കിണറ്റില്‍ ഇറങ്ങാനുള്ള ശ്രമം പരാജയപ്പെട്ടു. തുടര്‍ന്ന് വിഴിഞ്ഞം ഫയര്‍ സ്റ്റേഷനില്‍ വിവരമറിയിച്ചു .സ്റ്റേഷന്‍ ഓഫിസര്‍ റോസ്ചന്ദ്രന്റെ നേതൃത്വത്തിലെത്തിയ ഫയര്‍ഫോഴ്‌സ് സംഘത്തിലെ  ഫയര്‍മാന്‍ മോഹനന്‍ ഏറെ സാഹസപ്പെട്ട് കിണറ്റിലിറങ്ങി അവശനിലയിലായ അജിയെ രക്ഷിച്ച് കരയിലെത്തിക്കുകയായിരുന്നു.  കിണറില്‍ ചപ്പുചവറുകള്‍ നിറഞ്ഞിരുന്നതിനാല്‍ യുവാവിന് കാര്യമായ പരുക്കുകളുണ്ടായില്ല.