ഗൂഡല്ലൂര്‍: പതിനായിരങ്ങള്‍ സംഗമിച്ച് ഗൂഡല്ലൂര്‍ യതീംഖാന വനിതാ സന്ദര്‍ശനം. കേരളം, കര്‍ണാടക, തമിഴ്‌നാട് സംസ്ഥാനങ്ങളുടെ വിവിധ പ്രദേശങ്ങളിലുള്ളവരാണ് യതീംഖാന സന്ദര്‍ശിച്ചത്.
 വനിതാസന്ദര്‍ശന പരിപാടിയുടെ ഭാഗമായി തമിഴ്‌നാട് ട്രാന്‍സ്‌പോര്‍ട്ട് കോര്‍പ്പറേഷനും കെ.എസ്.ആര്‍.ടി.സിയും യതീംഖാനയിലേക്ക് പ്രത്യേക സര്‍വിസുകള്‍ നടത്തിയിരുന്നു. ഉനൈസ്, സഫറുല്ല, യാസിര്‍ അറഫാത്ത്, ഫയാസ് ജംഷീര്‍, റൂബീന, ബറക്കത്തുന്നിസ, ഫബിന, ഷാനിറ ബാനു, യാസ്മീന്‍ എന്നി വിദ്യാര്‍ഥികള്‍ പ്രാര്‍ഥനക്ക് നേതൃത്വം നല്‍കി.
കോഡിനേറ്റര്‍മാരായ ആയിഷ ടീച്ചര്‍, ഫാത്തിമ ടീച്ചര്‍, ജി.ടി.എം.ഒ ഹയര്‍ സെക്കന്‍ഡറി പ്രധാനാധ്യാപിക ശരവണ വടിവ് എന്നിവരുടെ നേതൃത്വത്തില്‍ വനിതാ വളണ്ടിയര്‍മാരായാണ് അഥിതികളെ സ്വീകരിച്ചത്. രാവിലെ എട്ടിന് ആരംഭിച്ച പ്രാര്‍ഥനാ സംഗമം വൈകിട്ട് ആറിന് സമാപിച്ചു. രാവിലെ നടന്ന ഉദ്ഘാടന സംഗമം പാണക്കാട് ശഹീറലി ശിഹാബ് തങ്ങള്‍ ഉദ്ഘാടനം ചെയ്തു. കെ.പി മുഹമ്മദ് ഹാജി അധ്യക്ഷനായി. അബ്ദുല്‍ ബാരി ഹാജി, ബാപ്പു ഹാജി, അലവി കുട്ടി ഹാജി, കുട്ടിപ്പ ഹാജി, വി.കെ മുഹമ്മദ് ഹാജി, കുഞ്ഞാവ ഹാജി, ജാവിദ് സേട്ട്, ഷാഹുല്‍ ഹമീദ്, കെ മുഹമ്മദലി, എം.പി ആലികുട്ടി ഹാജി പങ്കെടുത്തു. പി.കെ മുഹമ്മദലി ബാഖവി സ്വാഗതവും എന്‍.കെ അബ്ദുല്‍ സലാം മാസ്റ്റര്‍ നന്ദിയും പറഞ്ഞു.