ആംസ്റ്റര്‍ഡാം: കഴിഞ്ഞ ദിവസം നടന്ന യൂറോ കപ്പ് യോഗ്യതാ മത്സരത്തില്‍ ജര്‍മനിക്ക് ജയം. ഹോളണ്ടിനെ 3-2 എന്ന സ്‌കോറിനാണ് ജര്‍മനി പരാജയപ്പെടുത്തിയത്. ലിറോ സനെ (15), സെര്‍ജി ഗ്രാന്‍ബി (34), നികോ ഷുള്‍സ് (90) എന്നിവരാണ് ജര്‍മനിക്ക് വേണ്ടി ഗോള്‍ കണ്ടെത്തിയത്. മാതിസ് ഡി ലിറ്റ് (48), മെംഫിസ് ഡീപേ (63) എന്നിവരാണ് ഹോളണ്ടിന് വേണ്ടി ഗോള്‍ നേടിയത്.

മറ്റൊരു മത്സരത്തില്‍ ഹംഗറിയോട് ക്രൊയേഷ്യ പരാജയപ്പെട്ടു. 2-1 എന്ന സ്‌കോറിനായിരുന്നു ക്രൊയേഷ്യയുടെ തോല്‍വി. 13-ാം മിനിട്ടില്‍ ആന്റെ റെബിച്ചാണ് ക്രൊയേഷ്യക്ക് വേണ്ടി ഗോള്‍ നേടിയത്. ആദം സലയ് (34), മാറ്റെ (76) എന്നിവര്‍ ഹംഗറിക്ക് വേണ്ടിയും ഗോള്‍ നേടി. മറ്റൊരു മത്സരത്തില്‍ എതിരില്ലാത്ത രണ്ട് ഗോളുകള്‍ക്ക് ബെല്‍ജിയം ജയം സ്വന്തമാക്കി.
സൈപ്രസിനേയാണ് ബെല്‍ജിയം പരാജയപ്പെടുത്തിയത്. ഈഡന്‍ ഹസാര്‍ഡിന്റെയും ബാദുഷായിയുടെയും ഗോളുകളാണ് ബെല്‍ജിയത്തിന് ജയം സമ്മാനിച്ചത്. 2-1 എന്ന സ്‌കോറിന് നോര്‍തേണ്‍ ഐര്‍ലന്റ് ബലാറസിനെ പരാജയപ്പെടുത്തി. എതിരില്ലാത്ത രണ്ട് ഗോളുകള്‍ക്ക് പോളണ്ട് ലാത്വിയയെ പരാജയപ്പെടുത്തി. സ്‌ലോവേനിയയും മാസിഡോണിയയും തമ്മിലുള്ള മത്സരം 1-1ന് സമനിലയില്‍ കലാശിച്ചു.