അമ്പലപ്പുഴ:  അമ്പലപ്പുഴ റേഞ്ച് മദ്‌റസാ മാനേജ്‌മെന്റ് അസോസിയേഷന്റെ നേതൃത്വത്തില്‍ കേരള ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ്കുഞ്ഞ് മൗലവിയ്ക്ക് സ്വീകരണവും മദ്‌റസാ വിദ്യാര്‍ഥികള്‍ക്ക് ഏകദിന പഠന ക്യാംപും നാളെ  നടക്കുമെന്ന് പ്രസിഡന്റ് എച്ച് അബ്ദുല്‍ ഗഫൂര്‍, സെക്രട്ടറി ബി. സുലൈമാന്‍ എന്നിവര്‍ വാര്‍ത്താ സമ്മേളനത്തില്‍ പറഞ്ഞു. ഇതോടനുബന്ധിച്ച് ഹജ്ജിന് തെരഞ്ഞെടുക്കപ്പെട്ടവര്‍ക്ക് അനുമോദനവും പഠനക്ലാസും നടക്കും.
ബുധനാഴ്ച രാവിലെ 9.30 ന് മദ്‌റസാ വിദ്യാര്‍ഥികള്‍ക്ക് വിവിധ വിഷയങ്ങളിലുളള  ഏകദിന പഠന ക്യാംപും നടക്കും. അബ്ദുള്ള തങ്ങള്‍ ദാരിമി ഉദ്ഘാടനം ചെയ്യും. നീര്‍ക്കുന്നം ഇജാബ മുസ്‌ലിം ജമാഅത്ത് പ്രസിഡന്റ് ഇബ്രാഹീംകുട്ടി വിളക്കേഴം അധ്യക്ഷത വഹിക്കും. തുടര്‍ന്ന് ദീനി വിദ്യാഭ്യാസം എന്തിന് ? എങ്ങനെ ? ചതിക്കുഴികള്‍ തിരിച്ചറിയുക, മുസ്‌ലിം വ്യക്തിത്വ ബോധം ലക്ഷ്യവും സാക്ഷാത്കാരവും എന്നീ വിഷയങ്ങളില്‍ വിദഗ്ദര്‍ ക്ലാസ്സുകള്‍ നയിക്കും.
വൈകുന്നേരം 4 ന് നടക്കുന്ന സ്വീകരണ സമ്മേളനം കെ.സി. വേണുഗോപാല്‍ എം.പി. ഉദ്ഘാടനം ചെയ്യും. എച്ച് അബ്ദുല്‍ ഗഫൂര്‍ അദ്ധ്യക്ഷത വഹിക്കും. കേരള മുസ്‌ലിം ജമാഅത്ത് ഫെഡറേഷന്‍ സംസ്ഥാന ജനറല്‍ സെക്രട്ടറി കെ.പി മുഹമ്മദ് മുഖ്യാതിഥി ആയിരിക്കും.
കാപ്പ ഉപദേശക ബോര്‍ഡ് മെമ്പര്‍ എ നിസാമുദ്ദീന്‍ ഉപഹാര സമര്‍പ്പണം നടത്തും. അമ്പലപ്പുഴ റേഞ്ച് ജുംഇയ്യത്തുല്‍ മുഅല്ലമീന്‍ പ്രസിഡന്റ് മുഹമ്മദ് ഷാഫി മുസ്‌ലിയാര്‍ ഹജ്ജ് കമ്മിറ്റി ചെയര്‍മാന് സ്വീകരണം നല്‍കും. ഹജ്ജിന് തെരഞ്ഞെടുക്കപ്പെട്ടവര്‍ക്കുളള പഠനക്ലാസിന് കാക്കാഴം മുസ്‌ലിം ജമാഅത്ത് ഇമാം എ.എം കുഞ്ഞുമുഹമ്മദ് ബാഖവി നേതൃത്വം നല്‍കും. ഇബ്രാഹീംകുട്ടി വിളക്കേഴം, ടി.എ താഹാ, അബ്ദുല്‍ മുത്തലിബ് എന്നിവരും വാര്‍ത്താസമ്മേളനത്തില്‍ പങ്കെടുത്തു.