കൊല്ലം: എക്‌സൈസ് സംഘം കൊല്ലം നഗരത്തില്‍ നടത്തിയ പരിശോധനയില്‍ ഒന്നരകിലോ കഞ്ചാവുമായി യുവാവ് പിടിയിലായി. കാവനാട് കെ.എസ്.ഇ.ബി നഗറില്‍ വാടകയ്ക്ക് താമസിക്കുന്ന ഷാല മന്‍സിലില്‍ സുല്‍ഫീക്കറാണ് (37) എക്‌സൈസ് ഷാഡോ സംഘത്തിന്റെ പിടിയിലായത്. ഇയാളില്‍ നിന്നും ഒന്നരക്കിലോ കഞ്ചാവും, കഞ്ചാവ് പൊതിയാന്‍ ഉപയോഗിക്കുന്ന നൂറിലധികം സെല്‍ഫ് സീലിങ് കവറുകളും പിടിച്ചെടുത്തു.
തമിഴ്‌നാട്ടില്‍ നിന്നും കിലോയ്ക്ക് പതിനയ്യായിരം രൂപ നിരക്കില്‍ വാങ്ങുന്ന കഞ്ചാവ് ചെറിയ പാക്കറ്റുകളിലാക്കി ഒന്നിന് 500രൂപാ നിരക്കിലാണ് വില്‍പന നടത്തിയിരുന്നത്. വിദ്യാര്‍ഥികള്‍ക്കും മത്സ്യത്തൊഴിലാളികള്‍ക്കുമാണ് വിതരണം ചെയ്തിരുന്നത്. എക്‌സൈസ് രഹസ്യനിരീക്ഷണത്തിലാണ് ഇയാള്‍ പിടിയിലായത്. മുന്‍പ് കഞ്ചാവു കേസില്‍ ഇയാള്‍ ജയില്‍ശിക്ഷ അനുഭവിച്ചിട്ടുണ്ട്.
പരിശോധനയില്‍ എക്‌സൈസ് ഇന്‍സ്‌പെക്ടര്‍ താജുദ്ദീന്‍കുട്ടി, പ്രിവന്റീവ് ഓഫീസര്‍മാരായ ബി.ദിനേഷ്, വിനോദ്, വിഷ്ണുരാജ്, എസ്.ആര്‍ ബിനു തുടങ്ങിയവര്‍ നേതൃത്വം നല്‍കി.