കൊച്ചി: ജിഷ്ണുവിന്റെ അമ്മ മഹിജ നടത്തിയ സമരം മലപ്പുറത്തെ ഉപതെരഞ്ഞെടുപ്പിനെ ബാധിച്ചിട്ടില്ലെന്ന് മന്ത്രി ജി.സുധാകരന്‍. ജിഷ്ണു പ്രണോയിയുടെ അമ്മ മഹിജയുടെ സമരവുമായി ബന്ധപ്പെട്ട് പുറത്തുവന്നത് കെട്ടുകഥകളാണ്. അമ്മയ്‌ക്കൊപ്പമുണ്ടായിരുന്ന തങ്ങളെ ശത്രുപക്ഷത്താക്കി. സമരം കൊണ്ട് എന്തു നേടിയെന്ന് ചോദിച്ച മുഖ്യമന്ത്രിയെ വളഞ്ഞിട്ട് ആക്രമിക്കുകയാണ് ചെയ്തതെന്നും അദ്ദേഹം പറഞ്ഞു.

മലപ്പുറം ലോക്‌സഭാ തെരഞ്ഞെടുപ്പ് സര്‍ക്കാരിനെതിരായ വിധിയെഴുത്തല്ല. ഇവിടെ ഇടതുമുന്നണിയ്ക്ക് വോട്ടുകൂടി. സ്ത്രീകളുടെ ഭൂരിഭാഗം വോട്ടും എല്‍.ഡി.എഫിന് ലഭിച്ചെന്നും സുധാകരന്‍ പറഞ്ഞു.

ഒരേ സമയത്ത് ദേശാഭിമാനിക്കാരന്‍ ആണ്, പാര്‍ട്ടിക്കാരന്‍ ആണെന്നെല്ലാം പറയുകയും ഗവണ്‍മെന്റിനെതിരെ പറയുകയും ചെയ്യുകയാണ്. ഗവണ്‍മെന്റിനെതിരെ പറഞ്ഞാല്‍ പാര്‍ട്ടിയില്‍ കാണില്ലെന്നും അദ്ദേഹം കൂട്ടിച്ചേര്‍ത്തു.