ന്യൂഡല്‍ഹി: പുണെയില്‍ ഏണസ്റ്റ് ആന്‍ഡ് യങ് കമ്പനിയില്‍ ചാര്‍ട്ടേഡ് അക്കൗണ്ടന്റായ അന്ന സെബാസ്റ്റ്യന്റെ മരണത്തില്‍ സ്വമേധയാ കേസെടുത്ത് ദേശീയ മനുഷ്യാവകാശ കമ്മിഷന്‍. നാല് ആഴ്ചയ്ക്കകം റിപ്പോര്‍ട്ട് സമര്‍പ്പിക്കണമെന്നാണ് കേന്ദ്ര തൊഴില്‍ മന്ത്രാലയത്തിന് മനുഷ്യാവകാശ കമ്മീഷന്റെ നിര്‍ദേശം. വിഷയത്തില്‍ എന്തു നടപടി എടുത്തെന്ന് അറിയിക്കണമെന്നും കമ്മീഷണ്‍ നിര്‍ദേശം നല്‍കിയിട്ടുണ്ട്

അന്നയുടെ മരണ കാരണം ജോലിഭാരമാണെന്നതില്‍ കമ്മിഷന്‍ അതീവ ആശങ്ക പ്രകടിപ്പിച്ചു. മാനസിക പിരിമുറുക്കം, ഉത്കണ്ഠ, ഉറക്കമില്ലായ്മ എന്നിവയുള്‍പ്പെടെ തൊഴിലിടത്ത് യുവ പ്രൊഫഷണലുകള്‍ നേരിടുന്ന വെല്ലുവിളികളെക്കുറിച്ച് അന്നയുടെ മരണം ഗുരുതരമായ ചോദ്യങ്ങളാണ് ഉയര്‍ത്തുന്നത്. സുരക്ഷിതവും ജീവനക്കാര്‍ക്ക് പിന്തുണയേകുന്നതുമായ തൊഴില്‍ അന്തരീക്ഷം സൃഷ്ടിക്കേണ്ടത് തൊഴിലുടമയുടെ ഉത്തരവാദിത്വമാണെന്ന് കമ്മിഷന്‍ വ്യക്തമാക്കി.

ജൂലൈ 20ന് ഏണസ്റ്റ് ആന്‍ഡ് യങ് ഇന്ത്യയില്‍ ജോലിയിലിരിക്കെ താമസസ്ഥലത്ത് വച്ച് അന്ന സെബാസ്റ്റ്യന്‍ കുഴഞ്ഞുവീണ് മരിക്കുകയായിരുന്നു. കമ്പനിയില്‍ ചാര്‍ട്ടേഡ് അക്കൗണ്ടന്റായി ചേര്‍ന്ന് നാല് മാസത്തിനുള്ളിലാണ് അന്നയുടെ അപ്രതീക്ഷിത വിയോഗം. അമിത ജോലി ഭാരമാണ് മകളുടെ മരണത്തിന് കാരണമെന്ന് പറഞ്ഞുകൊണ്ട് യുവതിയുടെ അമ്മ ഏണസ്റ്റ് ആന്‍ഡ് യങ് ഇന്ത്യയുടെ ചെയര്‍മാന് അയച്ച ഹൃദയഭേദകമായ കത്ത് സോഷ്യല്‍മീഡിയയില്‍ വലിയ തോതിലുള്ള ചര്‍ച്ചക്ക് വഴിവെച്ചിരുന്നു.

 The National Human Rights Commission (NHRC) has taken suo motu cognizance of Ann Sebastian's death, initiating an investigation into the circumstances surrounding the tragic event to ensure justice and protect human rights.