കണ്ണൂര്‍: വിഭവസമൃദ്ധമായ കൂണ്‍ ഭക്ഷ്യവിഭവങ്ങള്‍ ഒരുക്കി പുഴാതി പ്രദേശവാസികള്‍. കാര്‍ഷിക വികസന വകുപ്പിന്റെ കീഴിലുള്ള പുഴാതി കൃഷിവകുപ്പിന്റെ പരിധിയിലുള്ള മുപ്പതോളം കുടുംബങ്ങളാണ് കൂണ്‍ കൃഷിയുമായി രംഗത്തിറങ്ങുകയും വിഭവ സമൃദ്ധമായ ഭക്ഷ്യ വിഭവങ്ങള്‍ ഒരുക്കിയത്. ജൈവ പച്ചക്കറികള്‍ പ്രോത്സാഹിപ്പിക്കുന്നതിന്റെ ഭാഗമായി കാര്‍ഷിക വികസന കര്‍ഷക ക്ഷേമ വകുപ്പ് പരമ്പരാഗത കൃഷി വികാസ് യോജന ടൗണ്‍സ്‌ക്വയറില്‍ സംഘടിപ്പിച്ച പ്രദര്‍ശന വിപണന മേളയിലാണു മഷ്‌റൂം ഫെസ്റ്റ് ഒരുക്കിയത്.  കൂണ്‍കൃഷി ആരംഭിക്കുമ്പോള്‍ ഈ കൂട്ടായ്മയില്‍ 14 പേരാണുണ്ടായിരുന്നത്. ഇതിന്റെ വിപണി സാധ്യത അറിഞ്ഞതോടെ കൂടുതല്‍ പേര്‍ കൂണ്‍കൃഷി രംഗത്തേക്കു കടന്നു വന്നുവെന്നാണു സംഘാടകര്‍ പറയുന്നത്. കൂണുകൊണ്ടുള്ള ബിരിയാണി, കട്ട്‌ലറ്റ്, സമൂസ, പിസ്ത, റോള്‍, കട്ട്‌ലറ്റ്, ഉണ്ണിയപ്പം, പ്രഥമന്‍, ചില്ലി തുടങ്ങിയ വിഭവങ്ങള്‍ മേളയിലുണ്ട്.
ഒരു കിലോ കൂണിന് 40 രൂപയാണ് വില. കണ്ണൂരിലെ പച്ചക്കറി വില്‍പ്പന കേന്ദ്രത്തിലൂടെയാണു കൂണുകള്‍ വില്‍ക്കുന്നതെന്നും പ്രമേഹ രോഗികള്‍ക്കും കൊളസ്‌ട്രോള്‍, അര്‍ബുദരോഗത്തിനും രക്തസമ്മര്‍ദത്തിനുമെല്ലാം കൂണുകൊണ്ടുള്ള വിഭവങ്ങള്‍ നല്ലതാണെന്നും സംഘാടകര്‍ പറഞ്ഞു.  കൂണ്‍ പ്രദര്‍ശനത്തോടൊപ്പം കൂണ്‍ കൃഷിയുമായി ബന്ധപ്പെട്ടു പഠനക്ലാസ് സംഘടിപ്പിക്കുമെന്നും അവര്‍ അറിയിച്ചു. കൂണുകള്‍ക്കൊപ്പം വിവിധ കൃഷിഭവന്‍ മുഖേന നടത്തിയ കാര്‍ഷിക ഉല്‍പന്നങ്ങള്‍, കുറ്റിയാട്ടൂര്‍ മാങ്ങ എന്നിവ പ്രദര്‍ശനത്തിലുണ്ടായിരുന്നു. എടക്കാട് കൃഷിഭവനു കീഴിലെ കര്‍ഷകര്‍ 4.5 കിലോ വരുന്ന നീളന്‍ പടവലങ്ങയും കുമ്പളങ്ങയും പ്രദര്‍ശന മേള സന്ദര്‍ശിച്ചവരെ ആശ്ചര്യപ്പെടുത്തി. പേരാവൂര്‍, എടക്കാട്, ഇരിക്കൂര്‍ എന്നീ ബ്ലോക്കുകള്‍, മയ്യില്‍ റൈസ് പ്രൊഡ്യൂസര്‍ കമ്പനി തുടങ്ങിയവയുടെ സ്റ്റാളുകളും ചക്ക വിഭവങ്ങളും വിവിധ തരം അച്ചാറുകളും ചെടികളുമെല്ലാം പ്രദര്‍ശന സ്റ്റാളില്‍ ഒരുക്കിയിരുന്നു. കലക്ടര്‍ മീര്‍ മുഹമ്മദലി ഉദ്ഘാടനം ചെയ്തു.