പാലക്കാട്: ഒരു നാട് ഒന്നടങ്കം പരാതിപ്പെട്ടിട്ടും നിയമത്തെ വെല്ലുവിളിച്ച് കൊണ്ട് നടത്തുന്ന ഇഷ്ടിക ചൂള നിര്‍ത്തിക്കാന്‍ അധികാരപ്പെട്ടവര്‍ ഒന്നും ചെയ്യുന്നില്ല. പുതുശ്ശേരി പഞ്ചായത്തില്‍ അട്ടപ്പള്ളം വാധ്യാര്‍ ചള്ളയിലാണ് നാലേക്കര്‍ സ്ഥലത്ത് അധികാരികളുടെ ഒത്താശയോടെ ഇഷ്ടിക ചൂള പ്രവര്‍ത്തിക്കുന്നത്. 100 ഓളം തൊഴിലാഴികള്‍ ജോലി ചെയ്യുന്ന ഈ ചെങ്കല്‍ചൂളയില്‍ നിന്ന് 25000 ത്തിലേറെ കല്ലുകള്‍ ദിനംപ്രതി കയറ്റി പോകുന്നുണ്ട്. സൂര്യാഘാത ഭീഷണിയെ തുടര്‍ന്ന് ഉച്ച നേരത്ത് ജോലിക്ക് നിയന്ത്രണം ഏര്‍പ്പെടുത്തിയിട്ടുണ്ടെങ്കിലും അതെല്ലാം അവഗണിച്ച് കൊണ്ട് നട്ടുച്ച നേരത്തു പോലും തൊഴിലാളികള്‍ക്ക് ജോലി ചെയ്യേണ്ട അവസ്ഥയുണ്ട്. തമിഴ്‌നാട്ടില്‍ നിന്ന് കുടുംബമായി വന്നിട്ടുള്ളവരുടെ കുട്ടികളും ഇവിടെ തൊഴില്‍ ചെയ്യുന്നുണ്ട്.
ത്യശൂര്‍ സ്വദേശിയായ ഒരാളാണ് ചെങ്കല്‍ ചൂള നടത്തുന്നത്. കുടിവെള്ളം ടാങ്കര്‍ ലോറിയില്‍ പോലും കിട്ടാത്ത പ്രദേശത്ത് ലക്ഷകണക്കിന് ലിറ്റര്‍ വെള്ളം ഉപയോഗിച്ചാണ് ഇഷ്ടിക നിര്‍മ്മാണം. ജിയോളജി., റവന്യൂ തുടങ്ങിയ വകുപ്പുകളുടെ ഒരു അനുമതിയും ഇല്ലാതെ യന്ത്രസഹായത്തോടെയാണ് ഇഷ്ടിക ചൂളയുടെ പ്രവര്‍ത്തനം. ഇഷ്ടിക ചൂളയുടെ മറവില്‍ അനധികൃതമായി കളിമണ്ണ് കടത്തും നടത്തുന്നുണ്ട്.
നാട്ടുകാര്‍ ചൂളക്കെതിരെ പരാതിയുമായി വന്നിട്ടുണ്ടെങ്കിലും റവന്യൂ വകുപ്പ് പ്രത്യേകിച്ച് ഒന്നും ചെയ്തിട്ടില്ല. ഇഷ്ടിക പിടിച്ചെടുത്ത് പിഴ അടപ്പിക്കാന്‍ മാത്രമേ തങ്ങള്‍ക്കു കഴിയു എന്നും ഒരിക്കല്‍ വാളയാര്‍ എസ് ഐയുടെ നേതൃത്വത്തിലുള്ള പൊലിസ് സംഘത്തോടൊപ്പം ചൂളയിലേക്ക് പോയെങ്കിലും വെന്തകല്ല് കിട്ടാത്തതിനാല്‍ പിടിച്ചെടുക്കാന്‍ കഴിഞ്ഞിട്ടില്ലെന്നും സ്ഥലം തഹസില്‍ദാര്‍ പറഞ്ഞു. സ്റ്റോപ്പ് മെമ്മോ കൊടുത്തിട്ടുണ്ട്, ക്രിമിനല്‍ കേസെടുക്കാന്‍ വാളയാര്‍ എസ്.ഐ ക്ക് പരാതി കൊടുത്തിട്ടും പൊലിസ് നടപടി എടുത്തിട്ടില്ലെന്നും തഹസില്‍ദാര്‍ പറഞ്ഞു. ജിയോളജി ലക്ഷങ്ങള്‍ പിഴ നിര്‍ദേശിച്ചിട്ടും പിഴ അടച്ചിട്ടില്ല.
യാതൊരു വിധ ലൈസന്‍സും ഇല്ലാതെ ചെങ്കല്‍ചൂള പ്രവര്‍ത്തിക്കുന്നത് അധികാരികളുടെ ഒത്താശയോടെയാണെന്നും ചൂളക്കാരനുമായി സാമ്പത്തിക ഇടപ്പാടുള്ളതിനാലാണ് നടപടികള്‍ ഉണ്ടാകാത്തതെന്ന് നാട്ടുകാരനായ അബ്ബാസ് പറഞ്ഞു.