മണ്ണാര്‍ക്കാട്: ബൈക്ക് മോഷണക്കേസില്‍ രണ്ട് യുവാക്കളെ നാട്ടുകല്‍ പൊലിസ് പിടികൂടി. കരിമ്പുഴ പൊമ്പ്ര സ്വദേശി മുറിച്ചിറ വീട്ടില്‍ മുനവ്വിര്‍ (19), മണ്ണാര്‍ക്കാട് കുന്തിപ്പുഴ വളളിക്കാടന്‍ വീട്ടില്‍ സജാദ് (21) എന്നവരാണ് പൊലിസില്‍ പിടിയിലായത്. ഈ മാസം 12ന് മണ്ണാര്‍ക്കാട് - പെരിന്തല്‍മണ്ണ ദേശീയ പാതയില്‍ വാഹന പരിശോധന നടത്തുന്നതിനിടെ നിര്‍ത്താതെ പോയ ബൈക്ക് ചെത്തല്ലൂരില്‍ ഉപേക്ഷിച്ചിരുന്നു. ഇതുമായി ബന്ധപ്പെട്ട് നടത്തിയ അന്വേഷണത്തിലാണ് യുവാക്കളെ പൊലിസ് പിടികൂടിയത്.
പെരിന്തല്‍മണ്ണ, മലപ്പുറം, മഞ്ചേരി, പാലക്കാട് സ്റ്റേഷന്‍ പരിധികളില്‍നിന്ന് യമഹ എഫ്.സെഡ് ഇനത്തില്‍പ്പെട്ട മൂന്ന് ബൈക്കും, ബജാജ് ഡിസ്‌കവറി ഇനത്തിലെ ഒരു ബൈക്കും ഇവര്‍ മോഷ്ടിക്കപ്പെട്ടതായി അന്വേഷണത്തില്‍ തെളിഞ്ഞിട്ടുണ്ട്. പ്രതികളെ വൈകുന്നേരത്തോടെ മണ്ണാര്‍ക്കാട് മുന്‍സിഫ് കോടതിയില്‍ ഹാജരാക്കി. പ്രതികളെ പിടികൂടിയതും മോഷ്ടിക്കപ്പെട്ട ബൈക്കുകള്‍ കണ്ടെത്തുന്നതിനും നാട്ടുകല്‍ പൊലിസ് എസ്.ഐ മുരളീധരന്‍, എ.എസ്.ഐ അബ്ദുല്‍ സലാം, സി.പി.ഒമാരായ ഷാഫി, ഷനോജ്, സഹദ് എന്നിവരാണ് നേതൃത്വം നല്‍കിയത്.