പാനൂര്‍: നരിക്കോട്ട് മലയിലെ ആദിവാസി സാക്ഷരതാ പഠിതാക്കള്‍ക്ക് ഗുണമേന്മയേറിയ കണ്ണടയുമായി പ്രവാസി കൂട്ടായ്മ. ഖത്തര്‍ കെ.എം.സി.സി. കടവത്തുര്‍ ഏരിയ കമ്മിറ്റിയുടെ നേതൃത്വത്തിലാണ് കണ്ണടകള്‍ നല്‍കിയത്.തൃപ്രങ്ങോട്ടൂര്‍ പഞ്ചായത്ത് സാക്ഷരതാ സമിതിയും കണ്ണൂര്‍ ജില്ലാ ആശുപത്രിയും സംയുക്തമായി ഇവിടെ വച്ച് കണ്ണ് പരിശോധന നടത്തിയിരുന്നു. ഇതില്‍ കണ്ണട ആവശ്യമായി വന്ന മുഴുവന്‍ ആദിവാസി പഠിതാക്കള്‍ക്കുമാണ് കണ്ണട നല്‍കിയത്.നരിക്കോട്ട് മല സാംസ്‌കാരിക നിലയത്തില്‍ നടന്ന ചടങ്ങില്‍ വച്ച് പഞ്ചായത്ത് പ്രസിഡന്റ് കാട്ടൂര്‍ മുഹമ്മദ് കണ്ണടകള്‍ വിതരണം ചെയ്തു.വൈസ് പ്രസിഡന്റ് ഉഷ രയരോത്ത് അധ്യക്ഷയായി.
വാര്‍ഡ് മെംബര്‍ കെ.സുരേഷ് ബാബു പഞ്ചായത്ത് അംഗം പി.സബിത, ഖത്തര്‍ കെ.എം.സി.സി. കടവത്തൂര്‍ ഏരിയ ട്രഷറര്‍ മുസ്തഫ പനങ്ങാട്, വൈസ് പ്രസിഡന്റ് അബ്ദുള്ള പാലേരി, വി.പി.ഇസ്മയില്‍, സാക്ഷരതാ പ്രേരക് വിജയശ്രീ സംസാരിച്ചു.