അന്തിക്കാട്: അനധികൃത ഓട്ടോ സ്റ്റാന്‍ഡ് മൂലം ഗതാഗതക്കുരുക്ക് രൂക്ഷം. അന്തിക്കാട് കാഞ്ഞാണി റൂട്ടിലാണ് അനധികൃത ഓട്ടോ പാര്‍ക്കിങ് യാത്രക്കാര്‍ക്കും കച്ചവടക്കാര്‍ക്കും ദുരിതമാകുന്നത്.
നേരത്തെ ഗതാഗതക്കുരുക്ക് രൂക്ഷമായതിനെ തുടര്‍ന്ന് മണലൂര്‍ പഞ്ചായത്ത് ഇടപെട്ട് പുതിയ ഓട്ടോസ്റ്റാന്‍ഡ് നിര്‍മിച്ചു നല്‍കിയെങ്കിലും ഓട്ടോറിക്ഷകളുടെ അനധികൃത പാര്‍ക്കിങ് പഴയപടി തുടരുകയാണ്.
പൊലിസുമായി ഉണ്ടാക്കിയ ധാരണയെ തുടര്‍ന്ന് രണ്ട് ഓട്ടോറിക്ഷകള്‍ക്ക് റോഡരികില്‍ പാര്‍ക്ക് ചെയ്യുവാന്‍ അനുമതി നല്‍കിയിരുന്നു. ഇതിന്റെ പേരിലാണ് കൂടുതല്‍ ഓട്ടോറിക്ഷകള്‍ പാര്‍ക്ക് ചെയ്യുന്നത്. ഇതു മൂലം സമീപത്തെ വ്യാപാര സ്ഥാപനങ്ങളിലേക്ക് എത്തുന്നവര്‍ക്ക് വാഹനങ്ങള്‍ പാര്‍ക്ക് ചെയ്യാനാകുന്നില്ല.
രണ്ടില്‍ കൂടുതല്‍ ഓട്ടോ പാര്‍ക്ക് ചെയ്യുന്നത് മൂലം ഇടുങ്ങിയ റോഡില്‍ ഗതാഗതക്കുരുക്ക് പതിവായി. മണലൂര്‍ പഞ്ചായത്തും പൊലിസും ഇടപെട്ട് പ്രശ്‌നത്തിന് പരിഹാരം കാണണമെന്നാണ് നാട്ടുകാരുടെ ആവശ്യം.