വളാഞ്ചേരി: വിദ്യാര്‍ഥികളെ കേന്ദ്രീകരിച്ച് കഞ്ചാവ് വില്‍പ്പന നടത്തുന്ന  യുവാക്കള്‍ എക്‌സൈസിന്റെ പിടിയിലായി. 700ഗ്രാം കഞ്ചാവ് അവരില്‍ നിന്നു പിടിച്ചെടുത്തു. പുത്തനത്താണി ആണ്ടികടവത്ത് മുനീര്‍(23), കല്‍പ്പകഞ്ചേരി സ്വദേശി അര്‍ഷാദ്(20) എന്നിവരെയാണു കുറ്റിപ്പുറം എക്‌സൈസ് പിടികൂടിയത്. തമിഴ്‌നാട്ടിലെ മൊത്ത വില്‍പ്പനക്കാരില്‍ നിന്ന് കേരളത്തിലേക്ക് കഞ്ചാവ് നേരിട്ടെത്തിക്കുന്ന സംഘത്തിലുള്ളവരാണു പ്രതികള്‍.
ചെറിയ പായ്ക്കറ്റുകളാക്കി വിദ്യാര്‍ഥികളെയും ഇതര സംസ്ഥാന തൊഴിലാളികളെയും ലക്ഷ്യംവച്ചാണു കഞ്ചാവ് വില്‍പ്പന നടത്തിയിരുന്നത്. ജില്ലയിലെ വിവിധ പൊലിസ് സ്റ്റേഷനുകളില്‍ മോഷണ കേസുകളിലും എക്‌സൈസ് റെയ്ഞ്ച് ഓഫിസുകളില്‍ കഞ്ചാവ് മയക്കുമരുന്ന് കേസുകളിലെ പ്രതിയാണ് പിടിയിലായ മുനീര്‍. ഇയാളുടെ സഹായിയാണ് അര്‍ഷദ്. കുറ്റിപ്പുറം എക്‌സൈസ് ഇന്‍സ്‌പെക്ടര്‍ വി.ജെ റോയിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് പുത്തനത്താണി ബാവപ്പടിയില്‍ നിന്നും പ്രതികളെ പിടികൂടിയത്.